Lampard-a'n Edinson Cavani a fak

Chelsea manager Frank Lampard chuan Paris St-Germain-a tla tlum lo ṭan Edinson Cavani chu player ṭha tak a nih thu a sawi a, Chelsea pan tur anga sawi thawm a ri ring lehzual sauh. 

Kum 32 mi Cavani hi nipuiah chuan a contract a zo tawh dawn a, Atletico Madrid pawhin lakluh tuma dawrin Cavani hian French club hnenah chhuah a dil hial a ni. Lampard chuan, "Player ṭha tak a ni a, kei pawhin ka lo hmachhawn tawh avangin a rilru puthmang leh huaisenna hi ka duh hle. Goal a khung zozai hi thlir ila, chu chuan a theihna a hrilhfiah a ni," a ti. 

Chelsea legend chuan, "Thil awm dan chiang takin ka hre lo a, kan la thlir zel ang chu. Player tawnhriat nei hruai luh hi thil ṭha tak a nih ve theihna a awm a, player naupang zawkte hian a chang chuan puitu an mamawh ve ṭhin a ni, a ti - Cavani an dawr ngeia ngaihna a ri ring hle. 

Manchester United pawhin lakluh an duh Cavani hian club game 577-ah goal 351 a khung thei a, kum 2013 khan pound maktaduai 55-in Napoli aṭangin PSG hi a zawm. Uruguay tan match 116-ah goal 50 a khung a, PSG tan match 292-ah goal 198 a khung thung. Tun season-ah erawh a beisei angin hmun a chang lo a, match 14-a khelh tawhah goal nga chiah a la khung.