FIFA buaina 2026 World Cup thlen dil theih hun an sawn hla

Tunhnaia eiruk thubuai leh World Cup thlen dan chhuichianna avanga FIFA buainain ziaawm lam a pan hlei­thei lo a, president Sepp Blatter meuhin banna a thehluh hnuah 2026 World Cup thlengtu tur thlanna hun tura ruat sa chu sawn hlat a ni.

Ruahman sa ang chuan FIFA World Cup 2026 thlengtu tur hi May 2017-ah Kuala Lumpur-ah neih tura ruahman a ni.

FIFA secretary gene­ral Jerome Valcke chuan tuna FIFA boruak tawn mek nena ngaihtuahin 2026 FIFA World Cup thlengtu tur ngaihtuahna lo buaipui chu thil atthlak nia a hriat thu a sawi.

Kum 2026 World Cup thlen duhtu zingah USA chu hming langsar ber pawl a ni a, kumina hmeichhe World Cup thlengtu Canada bakah Mexico leh Colombia te pawhin thlen dil an tum nia sawi a ni.

Swiss Court-in an World Cup thlen dan a rinhlelh vanga a chhui chiang mek Russia leh Qatar te hi 2018 leh 2022 World Cup thleng turin FIFA executive member 22 te'n vote thlakin December 2010 khan an thlang a ni. Russia leh Qatar erawh chuan puh hmingchhiat an nihna hi an pha nasa hle a, an puhna ang hi a lo dik ngei a nih chuan an World Cup thlen tur pawh hlihsak an nih tur thu FIFA hruaitu lawk zinga mi Domenico Scala chuan a lo sawi tawh a ni.

FIFA chuan 2026 World Cup thlengtu tur thlanna neih hun tur hi tunkar chhunga tihchian hman an inbeisei thu an sawi. Kum 2018 World Cup thlenna tur hmun enfiaha Russia-a zin mek Valcke chuan, "Kan dinhmun leh boruak enin kum 2026 World Cup thlengtu tur buaipuia lo buai hian awmzia a nei lo a ni," tiin engmah kalpui tak tak theih a la nih loh thu a sawi.

Valcke chuan kum 2010 World Cup South Africa-in an thlen theihna tura North & Central America khawmualpuia football thuneitu sang CONCACAF hotute hnena South Africa hruaitu te'n thamna sum dollar maktaduai 10 an pe anga US Department of Justice-in an puhna pawh a phatsak. French pachal Valcke hi thamna sum che velah hian lo inrawlh ve anga puh a ni.

Kum 54-a upa Valcke chuan, "FIFA pawisa pawh a ni lo a, South Africa sorkar thuneitute leh South African Football Association (SAFA)-in min ngen angin sum hi chu kan lo khawih ve mai a ni. Kan dan leh hrai bawhchhiatna thil a awm te a nih hran loh chuan keini chuan kan ti mai ṭhin a ni," a ti.

French TV journalist ṭhin Valcke chuan, "Eng ang buaina chiah nge hei hi a nih ka hre lo a, kei ber kher bi tum ka nih chhan hi ka hre lo lehzual," tiin eirukna laka a fihlim thu a sawi.

South Africa chuan thamna sum CONCA­CAF hruaitute hnena pe anga an puhna chu thamna sum ni loin football hmasawn nana ṭanpuina sum an thehchhuah a nih thu an sawi ve thung.

FIFA president Sepp Blatter-a'n a hna aṭanga a chawlh tur thu a puan hnu lawka mipui mit fukna chu Valcke hi a ni a, a ban thu puang ve mai tur angah tam tak chuan an ngai. Hemi chungchang hi sawichhuakin Valcke chuan, "Nangni media ho hian in duh dan danin thu inphuah kual a, Blatter ban vanga bang turah min ngai ve ngawt. Ka ban hi in lo thlahlel viau a nih chuan pawi tihna ka nei lo, mahse, hei erawh hre rawh u; heng eiruk thubuai vel vanga bang hi ka ni lo ang," a ti.

Hetihlai hian UEFA hotupa Michel Platini chuan FIFA buaina engmah a sawi duh loh thu sawiin UEFA chanchin leh FIFA chanchin bawlh­hlawh chu sawi pawlh a duh loh thu a sawi.