Brazil tan Firmino a vul

Brazil chuan Copa America inbuatsaih nan Honduras nen friendly match an khel a, attacking midfielder Roberto Firmino goal khat khung hmangin Dunga naute hi an chak.

Hoffenheim attacking midfielder Firmino hian minute 33 naah he inkhel a goal awm chhun hi khungin Honduras goalkeeper Noel Valla­dares dan hman lohin a khung.

Tun season-a Bar­celona champion nomawi pathum chawipuitu Brazil captain Neymar pawh second half minute 45 chhung khelmualah a inlan a, mahse goal erawh a khung lo.

Nilaini zan inkhelah hian mual neitu Honduras hian tharum hmangin Brazil hi an bei nasa hle a, vawi 22 zet an 'foul' a ni. Ball thiam Brazil-in ball chang tamin 65% zet an chang a, goal khung tumin vawi 15 goal-ah an pet laiin Honduras hian vawi sarih chiah an pet ve thung.

Nikum November thla khan Fermino hian Brazil senior team tan a khel ṭan chauh a, match ruk khel tawhin goal thum a khung tawh. Ram tan match la khel tam lo mah se Firmino hian mipui ngaihven a hlawh tawh hle. Nikum November thla khan Austria lakah goal khungin an ram a lo chak pui tawh bakah Chile leh Honduras lakah goal khung lehin Brazil vawi thum a chakpui tawh a ni.

Nikum FIFA World Cup-a Germany laka an mualpho hnuah Brazil hian tun hmaa an ram enkawl tawh tu Dunga an ko kir a, an tisual lo. Dunga hnuaiah hian match 10 khel tawhin an la chak fai vek.

Brazil striker Robinho chuan, "Kan inkhelh apaingin hmasawnna hmuh tur a awm zel avang­in a lawmawm hle. Tuna pawimawh ber chu ṭha taka Copa America khelh a ni. Kan inkhel ho tam tulh tulha kan inman tulh tulh bawk. Hei vang hian Copa-ah pawh hian beiseina kan nei sang hle," a ti.

July thlaa khelh tur CONCACAF Gold Cup inbuatsaih nan Honduras coach Jorge Luis Pinto-a naute hian July 1 khian Mexico an lo mikhual leh ang.