Benitez lawmtu Zidane

Real Madrid legend Zine­dine Zidane chuan an coach ban tak Carlo Ancelotti thlaktu tura Liverpool boss hlui Rafael Benitez ruat a ni chu thutlukna dik tak nia a hriat thu a sawi.

La Liga-a vawi hnih lai Valencia lo champion pui tawhtu Benitez hian kum sawm zet Spanish football a chhuahsan hnuin a coaching career bul ṭanna Real Madrid-ah manager ni turin a kir.

Ṭum hnih lai UEFA mana­ger of the year-a vawi hnih lai thlan lo ni tawh Benitez Real Madrid manager atana ruat a ni hian sawiselna tawk nasa viau mah se Zidane erawh chuan Benitez ruat a ni chu thutlukna dik tak nia a hriat thu a sawi.

Khawvel footballer ropui an sawi apianga sawi hmaih ngai loh tur Zidane chuan, "Club-in manager thar turin Benitez a ṭha tawkah an ngai a, thutlukna dik tak Real hian kan siamah kei chuan ka ngai a ni. Inthlak danglam kan mamawh vangin kan inthlak danglam a, club thultukna hi kan zah tur a ni," a ti.

French midfielder ropui

ṭhin chuan sawi chhunzawmin, "Hmun hrang hrangah trophy tam tak a chawi tawh a, he club hi a hrechiangin youth team te hial a lo enkawl tawh bawk. Chuvangin a ni hian Real hi a hrechiang a, kan ngaihpawimawh ber pawh result ṭha a nihzia hrechiang bertu a ni," tiin a club kalna apiang trophy chawi loh la nei ngai lo Benitez chu Real Madrid hrechiangtu a nih vangin Real enkawl tura a ṭhat ber thu a sawi.

Spanish second division lama Real Madrid B team enkawltu Zidane chuan Carlo Ancelotti thlaktu tur anga hminglam rik zingah tel mah se tun tut tut a Spanish club lian enkawl tumna a neih loh thu sawiin Benitez ruat a ni chu a lawmthu a sawi.

Champions League-a Juventus champion pui tawhtu Zidane chuan, "Castilla (Real B team sawina) enkawl hi ka la duh zawk a ni. Ka mawhphurna chu segunda division-a sang ber nih pui hi a ni a, season hman zawh takah khan kan ti thei lo a, season tharah erawh hlen ngei kan duh a ni," a ti.

Zidane chuan La Liga team la enkawl ngei a duh thu sawiin Real Madrid enkawl chu duhthusam thleng dik a nih tur thu a sawi.