Copa America - South America ram football thiam ber zawnna
Kum 99 liamta khan South American Football Championship of Nations (Campeonato Sud Americano de Football) chu ṭan a ni a, football hmanga khawmualpui inelnaa upa ber a ni.
Inelna hmasa ber hi kum 1916 khan Argentina khawpui Buenos Aires-ah an khelh ṭan a, ram pali Uruguay, Argentina, Brazil leh Chile te inelin Uruguay an champion. Inelna bul ṭantu zingah ram pali zingah kumin inelna thlengtu Chile chiahin champion nomawi an la chawi lo.
Copa America ṭan tirh hian khelh loh kum awm mah se chawhrualin kum tina neih a ni a, awmze nei taka kalpui a ni lo. Kum 1916 aṭanga kum 1967 thleng khan South American Football Championship of Nations hming vuah a ni.
Kum riat an awl hnuah kum 1975 khan ṭan ṭha lehin inelna hmingah 'Copa America' vuah a ni. South America khawmualpui football thuneitu sang CONMEBOL hnuaiah ram 10 chauh an awm avangin kum 1993 aṭang khan Copa America khel turin vawi khatah khawmualpui dang ram pahnih sawm ṭhin an ni a, Costa Rica, Mexico leh United States te chu sawm ngun zual an ni.
Copa America vawi 43 neih tawhah Uruguay an champion ngun ber a, champion lai an ni bawk.