Rinkai zingah Brazil leh Argentina

Copa America champion turin 2014 World Cup runners up Argentina chu rin ber an ni a, kum 22 hnuah Lionel Messi hoin champion an tum ang.

Tukin zing dar 5:00 khan a thlengtu Chile leh Ecuador ten opening match an khel a, rinkai Argentina-in Pathianni zing dar 3:00 khian Paraguay an hmachhawn ang a, FIFA World Cup-a sulhnu nei ṭha Brazil-in Thawhṭanni zing dar 3:00-ah Peru an hmachhawn bawk ang.

MSN-ah S a bo

Barcelona-in tun season-ah goal 175 an khung a, tlar hma mawitu Messi, Luis Suarez leh Neymar ten tun season-ah an pathumin goal 122 an khung a, Catalan club goal khung 70% hi South American forward-te khung a ni.

Copa America-ah player pahnih Messi leh Neymar an langsar dawn a, Messi hi Argentina captain niin Neymar hi Brazil captain a ni a, Suarez erawh 2014 FIFA World Cup-a Italy defender Giorgio Chiellini a seh avangin a tel thei dawn lo.

Suarez te lo tur hian inelna hlutna a ti tlahniam a, Uruguay tan champion nawn a harsa sawt bawk ang.

Intluk tawk

South America ramte hi an intluk tawk vek a, FIFA World Cup-ah pawh team ṭha pawl an ni thei zel. Tun ṭumah hian khawmualpui dang aṭangin Mexico leh Jamaica te chu sawm an ni.

Group A-ah Chile, Mexico, Ecuador leh Bolivia an awm a; Group B-ah Argentina, Uruguay, Paraguay leh Jamaica awmin; Group C-ah Brazil, Colombia, Peru leh Venezuela te an awm bawk.

Group tin aṭangin a sang pahnihin quarterfinal an lut ang a, pathumna zinga result nei ṭha pahnihin quarterfinal an lut bawk ang. Inelnaah hian team 12 an awm a, pali an tla dawn tihna a ni. Kuminah hian quarterfinal leh semifinal-ah inhnehtawk an awm a nih chuan penalty shootout neih nghal tur a ni a, ram ṭha lo zawk tan dan ṭha tak a ni ngei ang.