Player ṭhate'n Man City zawm an chak - Al Mubarak

Manchester City chairman Khaldoon Al Mubarak chuan player ṭha te'n pawisa vang ringawt lo pawha Manchester City zawm an duh tawh thu a sawi.

Emirati (UAE mi sawina) sum­dawng hausa Al Mubarak chuan Abu Dhabi United Group-in kum 2008-a Man City an lei tirh kha chuan player ṭha lalut turin midang aia pawisa sen hnem zawk zel a ngaih thu sawiin tunah erawh thil a inthlak danglam tawh thu a sawi.

Al-Mubarak chuan, "Tunhma kha chuan Europe-a inlan pha lo club kan nih avangin player liantham lalut tur chuan club dang zawng aia sum kan insen hnem a ngai ṭhin. Mahse tunah chuan engkim a inthlak danglam tawh a, player zawng zawngin an khelh chakna club kan ni ta," tiin kum reilote chhunga an hnathawh a chhuang hle.

City hotupa Al-Mubarak chuan, "Khawvela club ṭha ber berte nen player kan inchuh thei der tawh a, player te'n tunhnaia kan hlawhtlinna te, kan academy kalpui dan, kan hmunhma neih ṭhat dan leh coach neih ṭhat dante an en a, he hmuna lokal hi an chak ṭhin a ni," a ti.

Heti chung hian City chairman chuan tun nipui transfer-ah player inchuh a nat tur thu sawiin, "Tunhnaia thil thleng dan leh a boruak te enin ṭum dang zawng aiin kumin transfer bazar-ah hian player inchuh a na dawn a ni," a ti.

2013-14 season a Premier League an chawi laiin kuminah Man City an nil a, Mubarak-a'n inthlak danglam a duh. Abu Dhabi khawchhuak sumdawng hausa chuan, Man City-ah hian thawhhona ṭha tak kan nei a, hei hi chhawm nun zel kan duh. Chutiang a nih rual chuan hma­sawn zel tur kan nih avangin min lo hawlhtlinpui tawh ṭhin player ṭhenkhat hi chuan chona thar hmachhawn turin hmundang an pan a ngaih chang a awm ṭhin," tiin player ṭhenkhat an chhuah tir tur thu a sawi.