2016 Euro Qualifiers Group H hmahruaitu inchuhna Croatia Vs Italy
Zanin dar 12:15 hian Spilt-ah Croatia-in Italy an mikhual dawn a, 2016 European Championship Group H hmahruaitu zawnna inkhel a ni ang. Qualifier match dangah Group B hmahruaitu zawnna Belgium leh Wales inkhel tur boruak a sang bawk.
Sulhnu
European Championship-ah Italy-in vawi thum final an lut tawh a, vawi khat an champion. Croatia erawh an la champion lo, kum 1945 aṭanga 1990 thleng khan Yugoslavia hnuaia an awm avangin Croatian player-te Yugoslavia tan an khel ṭhin. kum 1945 hma lam khan FIFA hnuaiah an lo inziak lut tawh a, friendly match vawi 19 an khel hman.
Kum 1990 aṭangin Croatia-in team hran an nei ṭan a, kum 1993 khan FIFA leh UEFA hnuaiah an inziak lut a, inelna lian tham an tel hmasak ber chu 1996 Euro kha a ni.
1998 FIFA World Cup-ah Croatia an ropui a, khawvel barakhaihin pathumna an ni a, an striker Davor Suker chu top scorer a ni. FIFA hnuaia an inziah luhna la rei lo mah se Croatia hi khawvel football thiam rama sawi tel an ni.
Head to Head
Italy leh Croatia hi vawi riat an intawng tawh a, kum 1942 khan Italy an chak a, an vawi hnih intawnna chu kum 52 hnu lam daih a ni. Croatia hian vawi thum hnehna an chang a, vawi li an inhnehtawk. An inhmachhawn hnuhnun ber ṭum chu nikum November thla kha a ni a, 1-1 in an inhnehtawk.
Group H dinhmun
Croatia hian vawi nga khelh tawhah vawi khat an draw a, a bak match li chak vekin Group H hmahruaitu an ni. Italy hneh loh an la tawng lo a, vawi hnih an draw avangin point hnihin Croatia an pha lo, hmahruaitu ni turin chak an mamawh.
Team Dinhmun
Croatia-in Champions League-a Barcelona champion puitu Ivan Rakitic an chhawr thei dawn a. Amaherawhchu khup hliam vangin Real Madrid midfielder Luka Modric an chhawr thei dawn lo, Milan Badelj leh Anas Sharbini ten Spurs midfielder hlui hmunruak an inchuh ang.
Italy-in 2016 Euro qualifier-ah match nga an khel tawhah goal an la khung vek a, goal hnih aia tam an la khung lo. Goal khung hi Italy buaina niin a lang a, chutihrualin Croatia lama goal khung tam beisei erawh a fuh lo ang.
Antonio Conte-a'n inhliam vangin Giorgio Chiellini, Andrea Barzagli, Simone Zaza leh Luca Antonelli te a chhawr thei dawn lo a, Andrea Ranocchia, Davide Astori, Mattia De Sciglio leh Graziano Pelle ten starting eleven chan an inbeisei thei ang.
Player manto Bale leh Wales
Group B-ah Belgium leh Wales-in point 11 ve ve an hmu tawh. Manchester United legend Ryan Giggs-a'n inelna lianah Wales a tlin pui thei lo a, khawvel player manto ber Gareth Bale-a'n Wales hi 2016 Euro a hruai thleng dawn niin a lang a, hmabak erawh a la awlsam lo. Pathumnaa awm Israel-in point kua an hmu tawh a, Wales mipui mittui ti tla theitu an ni.
Wales manager Chris Coleman chuan, "Football career-a pressure ka neih san ber ṭum a ni. Inkhelh tur a la tam avangin result danglam tak tak a la thleng thei a, a tawp thlengin theihtawp kan chhuah ang," tiin a sawi.
Wales hian 1958 World Cup hnuah inelna lian thamah an la inlan leh lo a, Coleman-a telna Wales-in 1994 World Cup an tling ṭep a, mah se vanduai vangin an tling zo lo.
Wales khingpui tur Belgium hi khawvel huapa player nei ṭha ram an ni a, Premier League player of the year Eden Hazard an kawl a, Chelsea aṭanga keeper ṭha Petr Cech nek chhuaktu Thibaut Courtois an kawl bawk.
Belgium hian friendly match-ah France 4-3 in an hneh a, goal hnih khungtu Manchester United midfielder Marouane Fellaini-a'n inhliam vangin Wales a hmachhawn thei dawn lo a, hrem vangin Manchester City captain Vincent Kompany an chhawr thei dawn lo bawk.
Zanin Inkhel Tur
Kazakhstan 9:30 PM Turkey
Iceland 12:15 AM Czech Republic
Latvia 12:15 AM Netherlands
Andorra 12:15 AM Cyprus
Bosnia 12:15 AM Israel
Wales 12:15 AM Belgium
Croatia 12:15 AM Italy
Malta 12:15 AM Bulgaria
Norway 12:15 AM Azerbaijan
Poland 9:30 PM Georgia
Rep of Ireland 9:30 PM Scotland
Finland 9:30 PM Hungary
Armenia 9:30 PM Portugal