Newcastle United manager thar Steve McClaren

Premier League club New­castle United chuan Thawhlehnia an manager John Carver an ban hnuin club manager thar atan Steve McClaren an lalut. Kum 54-a upa English manager hi club dang tihdan ang lo takin club board member zingah telh nghal a ni.

Thla hmasa a Championship club Derby County-in an manager aṭanga an ban tak McClaren hian tunhmain New­castle sawmna vawi hnih ngawt a lo hnar tawh a, December thlaa Alan Pardew-a'n St.James Park-a chhuahsan khan sawm hmasak ber niin Derby a awm a thlang zawk a, Premier League match thum chiah khelh tur a awm tawh tihna Magpies sawmna chu a vawi hnih nan a hnar leh bawk a ni.

England manager hlui a ṭawng pawr nghal a, "He club hian rei tak chhung chu trophy chawi hun a lo nghak tawh ṭhin a, he an thil nghah tih hlawhtlinsak hi ka tum hmasak ber tur a ni," a ti.

Nottingham Forest leh German club Wolfsburg-te pawh lo kaihruai tawh ṭhintu coach chuan, "Hna tam tak thawh tur neiin he hmunah hian ka lo kal a, he club hian hlawhtlin a duh zia chiang taka min hrilh vanga he hmuna lokal hi ka ni,"a ti.

Kum 1955 a FA Cup an chawi hnua trophy lian tham la chawi leh lo Magpies chu trophy chawi pui ngei a tum thu sawiin kum 2004 League Cup-a Middlesbrough champion puitu coach chuan, "Newcastle te ang club lian hi chuan trophy tam tak chawia Pre­mier League top eight huang chhung tala awm hi an phu a ni," a ti.

Magpies managing director Lee Charnley chuan kum 2010 Dutch League-a club lian pawh nilo FC Twente champion pui theitu coach chu fakin Newcastle enkawl tura a ni aia ṭha an awm loh thu a sawi.