Atletico Madrid leh Tevez inbia
Atletico Madrid manager Diego Simeone chuan an club thu neitute leh Juventus striker Carlos Tevez te chuan inbiakna an neih thu a sawi.
Argentine manager Simeone chuan Spanish chanchinbu pakhat hnenah inbiakna an neih thu leh Tevez lakluh an duh thu a sawi tel bawk. Tevez-a pawhin Italian club Juve chhuahsan a hreh loh thu a lo sawi ve bawk.
Barcelona laka La Liga champion nomawi hloh hlim Atletico manager chuan, "Keimah nen chuan inbiakna kan la nei hran lo. Mahse, kan club thuneitu ṭhenkhat nen chuan an inbe tawh," a ti.
Tevez hian tun season-ah Juventus tan a thawh hlawk hle a, Serie A champion nomawi a chawi pui bakah Coppa Italia-ah a champion pui bawk. Amaherawhchu, an duh ber pakhat Champions League final-ah erawh Spanish champion Barcelona lakah 3-1 in an tlawm thung.
Kum 31-a upa ni tawh mah se Tevez hian goal khung ala harsat lo hle a, heivang hian Spanish club hian an duh niin a lang.
A hnampuipa chungchang sawi chhunzawmin Simeone chuan, "A inkhelh dan kal hmang leh kan team khelh dan hi a inan avangin a tan harsatna a awm lo ang. Ani hi chuan goal khung hi a pianpui a nih avangin kan mamawh chhanna a ni ngei ang," tiin a sawi.
Simeone chuan Chelsea defener kum 29-a upa Filipe Luis leh Villareal forward Luciano Vietto te chu season thara a squad tichak turin lakluh a tum thu a sawi lang tel bawk.
Argentine striker hi English Premier League club striker mamawh tak Liverpool nen sawi zawm a ni mek bawk.