Friendly Match Germany ngam loh Klinsmann

Nilaini zan khan Germany leh United States te chuan international friendly match an khel a, substitute Bobby Wood goal khung hmangin Jurgen Klinsmann chuan a lo enkawl tawh ṭhin World Champion Germany a hneh.

USA forward Wood hian kar hmasaa Nether­lands nen an inkhelh ṭumin chakna goal a lo khung tawh bawk. Kum 22 chauha upa la ni mah se tun hnaiah thlamunapui tham khawpin Wood hi a khel ṭha.

Rhein Energie Stadion hmuna inkhelah hian inkhel ṭan hnu lawkah Arsenal playmaker Mesut Ozil chuan USA goal­keeper Brad Guzan tan hna a siam sak nghal. Midfielder Patrick Herr­mann thawhrah sengin Mario Gotze chuan minute 12 na lekah Germany hmahruaina goal a khung. Gotze hi nikum FIFA World Cup final-a Argen­tina an hnehna goal awmchhun khungtu kha a ni.

Anmahni rama inkhel an nih vang leh goal an kung hma em avangin Germany hi chak tur a rin kai an ni nghal. Goal eng zat nge an thun belh ang tih chu mipui rilru tam zawk a ni ngei ang. Amaherawhchu beisei angin thil a thleng lo.

Si khat phur USA an zam lo a, huaisen takin an si phurh sut tumin an nawr let. Chawlhlawk hma hretin New York City midfielder Mix Diskerud chuan an si phurh sutna goal a khung.

Second half-ah thil langsar thleng a tam lo a, LA Galaxy player Zardes thlaktu Wood chuan hun tawp hma minute thum chauh a awm tawh tiahah penalty area pawn aṭangin Germany goal dinglam sirah a thlawh lut. Germany hian an si phurh sutna hun nei zui ve nghal mah se midfielder Sami Khedira chuan yard ruk na lek aṭangin goal bar a tauh per.

Tun hmain USA hi German ramah an la chak ngai lo a, tun ṭum hi hnehna an channa hmasa ber a ni. USA manager Klinsmann-a tan July thlaa khelh tur Gold Cup atana inpuahchhana match hnuhnung ber a ni nghal bawk. Germany hian Inrinni khian Euro 2016 qualifying-ah Gibralta an hmachhawn leh ang.

USA leh Germany te hi vawi 12 an inhmachhawn tawh a, vawi sarih hnehna changtu Germany chungnung zawkin USA hian vawi li hnehna an chan ve na chiah a ni thung.

Germany coach Joachim Low chuan, "Result duhawm lo tak a ni chiang mai. Inkhel bul ṭan ṭhain beiseina sang tak nei hman mah ila kan chak si lo. Kan player pawimawh ṭhenkhat ten training an zawm theih loh vang leh training kan neih ṭhat tawk loh kan tuar a ni," tiin an chak lo chu an inbuatsaih ṭhat tawk loh vangah a puh.

Kum 2004 aṭanga 2006 chhung Germany lo enkawl tawh tu USA manager Klinsmann chuan, "Chak turin huaisenna kan nei a nih chuan hnehna kan chang ṭhin. Chutiang chu Germany nena kan match-ah khan kan hmu a ni. Kan captain Bradley ka fak a, goal kan chhuah hma avangin kan talbuai dawna a lan laiin ṭha takin inkhel a thunun thei. Chutih rualin chakna goal khungtu Wood pawh hmaih theih a ni lo ang, a ni kha awm lo se tuna kan hlimna hi kan nei thei lo ang," tiin a sawi.

International friendly match dangah Blerim Dzemaili goal hnih leh Xherdan Shaqiri goal khat khung hmangin Switzerland chuan 3-0 in Liechtenstein an hneh bawk.