FIFA president nih tum Zico

Brazil legend Zico chuan FIFA president ṭanglai Sepp Blatter-a'n a hna a bansan tur thu a puan hnuin Nilaini khan FIFA president a chuh tur thu a puang ve leh ta.

Kum 62-a upa India Super League-a FC Goa pawh lo enkawl tawhtu chuan FIFA president chuh chu a tan tih makmawh a nih thu sawiin FIFA chhungkuaa eirukna leh bawlhhlawh awm zawng zawng te chu then fai hna thawh a duh thu a sawi.

Rio de Janerio khaw­puia chanchinthar la­khawmtu te a kawmna­ah Zico chuan, "Infiamna huang chhung ami te tan chuan vawiina kan football khawvelin a thil tawn mek hi a lungawi thlak lohin a lungchhiatthlak hle a ni. Eirukna hmangin football hmai tih balh a ni a, mi tam takte thawhrimna chu a lo thlawn maia chan tir a ni bawk. Ka tawnhriat leh hriatna te chhawr ṭangkaia FIFA president hna chuh hi ka tih ngei ngei tur niin ka hria a ni," a ti.

Kum 1978, 1982 leh 1986 Brazil World Cup squad-a an player pawi­mawh ber pawl ni reng thei Zico hian Japan national team, Russian club CSKA Moscow leh Turkish club Fenerbahce te a lo enkawl tawh a, coaching lamah tawnhriat nei nual tawh mah se football administration lamah erawh tawnhriat ala nei lo hle.