Falcao pui duhtu Mourinho

Tunhnaia Chelsea nen an sawi zawm mek AS Monaco striker Radamel Falcao chungchangah Blues manager Jose Mou­rinho a ṭawng chhuak a, Colombian stri­ker chu England-ah hlawh­tling tura a puih theih a inbeisei thu a sawi.

Real Madrid a enkawl laia Falcao lo hrechiang tawhtu Mourinho chuan, "Season hman zawh taka United striker Falcao kan hmuh kha Falcao tak tak emaw tia mi tam zawkin an ngai hian ka rilru a ti na a ni. Spain-a coach hna ka thawh laiin Atletico Madrid striker hlui hi ka hmachhawn ṭhin a, a theihna hi ka hrechiang hle. A thiamna leh theihna tak tak nei let leh tura ka pui thei a nih chuan puih ka duh a ni," tiin London lamah Porto striker hlui hi hruai a tum hmel hle.

Kum 29-a upa striker hian season hmasa kha loan-in Manchester United-ah hun a hmang a, Premier League-ah goal li chiah khungin season tawpah a ngheta lakluhna hun ṭha United in nei mahse an lalut duh lo.