Benteke tan contract thar

Aston Villa chief exe­cutive Tom Fox chuan an striker duhlai Christian Benteke chu contarct thar an zawrh tur thu a sawi.

Kum 2012 khan Belgian striker Benteke hian Genk aṭangin pound maktaduai sarihin Villa hi a zawm a, kum 2013 khan a contract hi pawt sei lehin kum li daih a ziak thar. Tunah hian kum hnih dang cham turin hun ala nei mek. A contract-a an ziah dan chuan pound maktaduai 32.5 a lei ngam an awm a nih chuan a chhuak thei ang.

Kum 24-a upa Ben­teke hian season liamta khan Villa tan match 37 khelin goal 15 a khung a, manager thar Tim Sherwood hnuaiah a par vul hle. Premier League striker beiseiawm ber pawl a nih mek avang hian club lianin an ngaihven hle. Amah ngaihven tute zingah Liverpool chuan an hnaih ber nia ngaih a ni bawk.

Aston Villa hian an player pawimawh Fabian Delph chu January thla khan kum li daih contract thar an lo ziah pui tawh bawk a, ani ang tho hian Benteke pawh hian contract thar a ziah an beisei hle.

An player chhuanvawr chanchin sawiin Fox chuan, "Benteke hian chhuah a duh tlat a nih chuan kan dan theih a ni lo ang. Mahse, kan hnena cham tura kan duh avangin a tan contract thar duhawm zawk kan zawrh dawn a, a pawm ngei pawh kan beisei. Mi tam zawk chuan January thlaa Delph contract kan pawtsei pawh kha mak an ti tawh hial. Kan club hian hmasawn kan duh avangin manager thar kan lalut a, player ṭha kan mamawh bawk a ni," tiin a sawi.