Liverpool hmaah fiahna hautak tur Tottenham

Premier League hmahruaitu Liverpool boss Arne Slot a la ṭawng fimkhur reng a, Dutch coach hian, "Season laklawha kan awm mekna ni loin, season tawpa kan awmna en tur a ni," tiin a sawi a, tuna an dinhmun hmanga intihbuai a tum lo.

Slot chuan, "A nihna takah chuan kan vannei ve bawk. Arsenal khan season ṭantirah red card an hmu tam em em a, chuvang chuan point an hloh ṭhin. Keini pawhin red card kan hmu ve ṭan a, point kan hloh ve mai.

"Chutihlai takin khualmualah Tottenham kan hmachhawn dawn a, hei hi Arsenal leh Chelsea chuan an lo tawng thlap tawh," a ti - Reds hian Pathianni zan dar 10:00-ah Spurs hi league match khel turin an lenchilh dawn a, an tan fiahna a tling dawn.

Khai mah aw...

Spurs hi league table-ah 10-na chauh ni mah se, goal khung an harsat lo hle. League match 16-ah goal 36 ngawt an khung tawh a, tun season EPL-a goal khung tam lama an phak loh awmchhun chu goal 37 khungtu Chelsea chiah an ni.

London club hi Liverpool tlarhnung sawi nghing turin an ṭha tawk a, Reds hian tlarhnungah hliam vangin Conor Bradley leh Ibrahima Konate te an la chhawr thei dawn lo bawk. Spurs hian tlarhmaah Dominic Solanke, Dejan Kulusevski leh Son Heung-min te ho an nei a, buaipui tham ṭhah an ni.

Hetihrual hian coach Ange Postecoglou-a'n nomawi chawi a duh luatah, Ningani zan khan League Cup quarterfinal-ah a squad neih ṭhat ber a thawhchhuahpui a, 4-3 in chak mah se, Liverpool lakah a player-te an chau dawn tih a chiang - Reds tan chanchin lawmawm a tling.

Reds an fuh chiang!

Reds-in EPL leh Champions League-ah hma an hruai ve ve a, League Cup semifinal-ah Pathianni zana an lenchilh tur Tottenham an hmachhawn dawn bawk - Liverpool season a fuhchiang rih a, Slot hi an tan chuan 'Fuhchiangtea' a ni rih!

Mahse, December-ah ringawt pawh Reds hian match nga an khel tawh a, Everton nena an inkhel tur thlipui vangin an sawn mah mah! Hei vang hian Slot pawh a la ṭawng fimkhur reng a, Dutch coach hian, "League match 19 hnuah min teh rawh u," a ti a, tun thlengin an tana thla hautaka an sawi October leh November chu ṭha takin an paltlang tawh.

Zaninah League Cup-a chawlh hahdamtir Alisson, Mohamed Salah, Virgil van Dijk, Luis Diaz leh Dominik Szoboszlai te an lo kir thei dawn a, Fulham laka hnawhchhuah Andy Robertson-a'n match khat chauh hrem a tawh avangin a chhawr thei tawh a, League Cup-ah Cody Gakpo, Alexis Mac Allister, Diogo Jota, Joe Gomez leh Trent Alexander-Arnold te an khel tluan lo bawk a, chau loin Spurs an hmachhawn thei ang.