Barcelona khelmualah Atletico an leng dawn

Spanish La Liga-ah hmahruaitu Barcelona leh champion lai Real Madrid an intawlhthluk chhawk a, a chhawrtu pakhat chu season ṭantir lama beisei phak lo Atletico Madrid an ni.

Barca hian table chung ber luah mek mah se, pahnihna Atletico nen an point hmuh zat a inang tawh a, match khatin an la khel tam zui - pathumna Real hi point khat chauhin an hnufual.

Tun kartawp La Liga hi Krismas hmaa La Liga match hnuhnung ber a ni tawh dawn a, Krismas-ah La Liga table a danglam hlawk thei! Zanin dar 1:30-ah Barca-in Atletico an mikhual dawn a, Pathianni zan dar 8:45-ah Real-in Sevilla an mikhual thung ang.

Thawh a hun

Barca hi an league match hmasa 12-ah vawi khat chiah an tlawm a, a bakah an chak vek. Mahse, Catalan club hi tun hnaiah an chesual deuh reng a, an league match hnuhnung parukah vawi khat chiah an chak!

Vawi thum an tlawm a, vawi hnih draw an nei; an hneh lohte hi Real Sociedad, Las Palmas leh Leganes an ni a, an tlawm pahnih hi an mualah a ni bawk. Atletico-in Barca hneh theih tih an chiang a, chak an tum dawn.

Barcelona chet chhiat vanglai takin player chhuanvawr Lamine Yamal a inhliam a, Catalan club tan kum 17 mi forward tel thei lo tur hi chânna a tling. Hliam vanga a chawlh reng hnuah Ronald Araujo a lo kir leh thei tawh a, bul a ṭan nghal erawh a beiseiawm lo.

Hei le Atletico

Barca leh Atletico thawnthu a inang lo hle - Madrid khaw club hian an league match hmasa 11-ah vawi nga chiah chak an nei a, an league match hnuhnung parukah an chak vek thung.

Diego Simeone hoa harh tharna kawngah Antoine Griezmann a ṭangkai a, Barca player hlui hian tun season-ah goal 11 leh assist vawi ruk a nei tawh a, a club hlui Barca laka hnehna hlado chham a, table chung ber luah chunga Krismas chawlh hman a châk dawn.

Nipui transfer-a lakluh, season ṭantira beisei phak lo Alexander Sorloth pawhin match 24-ah goal sarih a khung tling ta a, assist vawi hnih a nei tel - Julian Alvarez lah a tlangnel tawlh tawlh a, match 25-ah goal 12 leh assist vawi hnih a nei tawh. Atletico tlarhma hi Barca tlarhnung ṭhiat turin an ṭha tawk.