Fury leh Usyk intawng leh dawn ta

Heavyweight boxing tinung thartu tia chhal ngam Tyson Fury leh Oleksandr Usyk-te chu a vawi hnih nan an intawng leh dawn ta - Inrinni zan, keini lam sanaa Pathianni zingah boxer pahnih hi an intawng dawn a, a chak zawkin WBA (Super), IBF, WBO, IBO leh The Ring heavyweight title an dawng ang.

Boxer rothap pahnih inhnekna event hi zanin dar 12:30 aṭangin a en ṭan theih dawn a, an pahnih tak hi chu Pathianni zing dar 4:30 velah inhmachhawn ṭan chauh tura ngaih a ni. DAZN-ah pay-per-view in en theih a ni dawn a, en man hi Rs. 1,680 a ni.

Boxer pahnih hi May 2024 khan lo intawng tawhin, split decision hmangin Usyk a chak a, Fury-a'm WBC title a kawl chu a hloh - British boxer hian tun inhnek tur atan chak ngei a tum thu a sawi a, "Tun ang reng rengin ka la serious ngai lo," a ti!

Fury chuan, "Thil tam tak sawi tur ka nei lo - mahse, he inhnekah hian hrehawmna leh natna tam tak a thleng dawn tih erawh ka sawi duh a, in lo en dawn nia," a ti.

Kum 34 mi Fury chuan, "Sawi tur a awm tawh lo. Kan intawn hmasak khan, ka fight danga ka tih fo angin ka ṭawng tam a, ka fiamthu reng bawk. Tunah chuan a ni ta lo a, ka thutak hle," tiin Usyk hneh ngei a tum thu a sawi - Fury hian Malta-a thla thum training a neih chhungin a nupui a be miah lo!

Usyk chuan, "Pathianniah engkim a chiang ang," tiin chak ngei a tum thu a sawi ve bawk a, Ukrainian boxer hian, "Hlau reng reng suh - ka kalsan dawn hleinem che," tiin Fury hi a vau zui.

Boxer pahnih hian Ningani zan khan media an hmachhawn a, minute 11 leh second 20 zet chu inhmachhawnin, engmah sawi loin an inmelh rum - Saudi Arabia-a inhnek turah boxer pahnih hian pound maktaduai 150 an insem dawn niin khawthlang media-te chuan an tarlang.