City hnehtu United an tlawm nghal; Amorim a rin ngam em?

Manchester United chuan Manchester Derby-a hnehna an chan hnu lawkah League Cup quarterfinal-ah Tottenham Hotspur 4-3 in an hneh lo. Ruben Amorim-a hote tan nomawi beiseina pahnih a bo a, Europa League leh FA Cup-ah erawh nomawi la thei an la ni.

Tottenham Hotspur stadium-a inkhelah mualneitu Spurs-in bul an ṭan ṭha a, Dominic Solanke goal hnih leh Dejan Kulusevski te goal hmangin 3-0 in hma an hruai. Joshua Zirkzee leh Amad Diallo te goal hmangin Man United-in siphurh sut ṭhen mah se Son Heung-min-a'n corner kick aṭangin a khung a, injury time-a Jonny Evans-a goal-in danglamna a thlen pha lo.

Nomawi duh leh inenchhin

Ange Postecoglou-a'n a club enkawl apiangah season hnihnaah chuan nomawi a chawi ziah thu a sawi tawh a, chutihrualin Spurs hi nomawi chawi thiam Jose Mourinho leh Antonio Conte te meuh pawhin nomawi an chawipui theih loh a ni.

Spurs boss Postecoglou-a'n nomawi a duh tih a lang a, kartawpah Liverpool nen inkhel dawn mah se a player neih ṭhat dan berin player a luhtir. Ruben Amorim erawhin League Cup a ngai pawimawh tawk lo a, player inenchhin nan a hmang thung.

Portuguese manager hian media hmaa ṭawngtam Marcus Rashford chu squad-ah a dah lo chhunzawm a, Alejandro Garnacho erawh squad-ah a awm tawh thung. City an hneh ṭuma bul ṭantu aṭangin player panga ngawt a thlak a; goalkeeper Altay Bayindir bakah Victor Lindelof, Leny Yoro, Christian Eriksen leh Antony te an lut. Andre Onana leh City laka chakna goal khungtu Amad Diallo te an tel loh avangin tun dinhmuna United ṭha ber an ni lo.

Keeper mualpho zan

Southampton sawptu Spurs-in goal an khung hmasa a, hla tak aṭanga Pedro Porro ball pet chu United keeper Bayindir-a'n hmun himah a nem per thei lo a, a per hi Solanke-a'n kawh zetin a pet goal.

Second half ṭantirhah United an chesual lehnghal a, James Maddison-a cross chu Lisandro Martinez-a'n Kulusevski tana pet nuam tawk chiahin a tiper a, Swedish forward hian six yard box pawn chiah aṭangin kawh zetin a pet goal.

Minute 54-naah Solanke-a'n inrintawkna nen through ball a um lut a, a hmaa ding Martinez-a bumin kawh zetin a pet goal. Spurs-in goal thum an khung a, United-in an la khung ve lo.

Amad-a chet ṭha mah se

Amorim-a'n inthlak danglam a ṭul tih hriain minute 56-naah Diallo, Joshua Zirkzee leh Kobbie Mainoo te a luhtir a, goal khat ṭheuh an khung. Chutihrualin Spurs keeper Fraser Forster chetsual vang a ni tel bawk.

Minute 63-naah Forster-a ball pek sual chu Bruno Fernandez-a'n changin Zirkzee a pe a, Dutch forward hian hnai tak aṭangin a pet goal. Minute 70-naah Forster-a ball pet chhuak tur chu Amad-a'n dang hmanin goal-ah a lut a, 3-2 a ni.

Man United-in beiseina thar an nei a, mah se Fraser Forster a chesual. Minute 88-naah Son-a corner pet chu Turkish keeper hian a dang thei lo. Injury time-ah Amad-a corner pet chu Jonny Evans-a'n tauh goal mah se result a danglam pha tawh lo a, Spurs 4-3 in an chak.

Engtin zel?

Man United-in Amorim-a enkawl hnuah hmasawnna nei mah se an result erawh chhuan tur a la awm meuh lo. Spurs hneh loin League Cup aṭangin an tla a, Premier League-ah pawh point 22 chauh la hmuin 13-naah an awm mek.

Portuguese manager hnuaiah Man United hian league match panga an khel tawh a, vawi hnih chiah la chakin vawi hnih an chak tawh lo a, vawi khat an inhnehtawk. Point 15 hmuh theih aṭangin point sarih chauh an la hmu a, champion chu an la hlat hle.

Chutihrualin Amorim hian club chhung siam ṭhat hna a thawk mek a, match zawnin squad-ah Rashford a dah lo. Sporting Lisbon manager hlui hian khelmuala an chet dan chauh ni loin an inchei dan thlenga a thlir thu a sawi a, English forward tan manager hmin turin insiamṭhat ngei a ṭul dawn.

Man United hian December 22, Pathianni zan dar 7:30 hian Bournemouth an mikhual dawn a, Cherries hi table-ah paruknaah an awm mek avangin zuam ngawt theih a ni lo. Amorim-a'n inenchhinna kalpui a la tum a nih pawhin result neih tel a ṭul ang.

Spurs an hneh loh zawhah Amorim chuan, "A ṭha lam sawi tur ka hre lo a, thil thlen dan ka zir chiang ang. Kan chak lo a, uluk takin kan han ngaihtuah ang a, hmasawnna tur kan hmu thei ang. Hmasawn turin kawng thui tak kan zawh a ṭul a, kan tum chu Premier League champion a ni," tiin a sawi.