Man City mangchhia belhchhah theitu Villa

Ni 50 a liam hnuah pawh Manchester City mangchhia a la reh thei lo a, match hnuhnung 11-ah Pep Guardiola hote hi vawi khat chiah an la chak avangin an buai tih zep rual a ni tawh lo. Premier League champion lai hian zanin dar 6:00 hian Aston Villa an tlawh dawn a, Villa Park-a inkhelin ngaihven a hlawh ang.

Man City hi match hnuhnung 11-ah hian match riat an chak lo a, vawi khat chiah chakin vawi hnih an inhnehtawk. Pep-a hote hian match hnuhnung berah an hmelma Manchester United an hneh lo a, Etihad Stadium-a an khelh an aṭangin inrintawkna an hloh tih a chiang hle.

Pep-a hote hian Joško Gvardiol hmangin goal khung hmasa mah se hun tawp dawnah ṭum hnih an chesual. Matheus Nunes-a'n penalty a chawi a, Gvardiol-a'n goalline-ah ball kheng ṭhelhin an hak loh phah bawk.

Kum liam taa Man City ang kha an ni rih lo a, inrintawkna an neih loh vangin hun pawimawhah an chesual a, hun harsaah mawhphurhna an la thei rih lo. Tun hnai thla hnih chhunga thil thlen dan hian mak tih a hlawh hle.

October 31, 2024 khan City-in League Cup last 16-ah Spurs an hneh lo a, camera-in bench-a ṭhu Erling Haaland leh Manuel Akanji te nui lai a la fuh. City hian League Cup-a tlak hi pawi ti loin lang mah se tunah erawh eng inelnaah pawh chak an harsat.

Man City-in November 20, 2024 khan Pep Guardiola contract chu season hnih atan an pawtsei tho a, June 2025-a tawp tur Spanish manager contract chu June 2027-ah a tawp dawn. City-in Premier League an awp zel dawnah ngaih theih hman mah se tunah erawh thil awm dan a danglam zo tawh.

City nomawi ṭhahnem tak chawipuitu Guardiola meuh pawh club ṭantute zingah ban duhtu an awm ṭan tawh a, result a ṭha lo zel a nih phei chuan Spanish manager tan Etihad Stadium-ah hmun a awm reng bik lo ang.

Tun dinhmunah erawh City-in Pep-a chungah rinna an nghat a, Spanish manager hian amah ringtu club thuneitu chungah a theihna a lantir a hun ta hle. Unai Emery kaihhruai Aston Villa pawh an che ṭha bik lo.

Villa hian match zawn zatin Brentford, Southampton leh RB Leipzig te hneh mah se match hnuhnung berah Nottingham Forest 2-1 in an hneh lo. Unai Emery hote hi match hnuhnung 12-ah vawi hnih chauh an chak ve tho.

Premier League-ah Villa hian point 25 hmuin pasarihnaah an awm mek a, point 27 hmu Man City hi an hneh thei a nih chuan Pep Guardiola hote chungah an awm dawn. Hei hi thil thleng thei a ni.