Pakistan-ah India an zin dawn lo

ICC Champions Trophy chu nakkum February 19 - March 19, 2025 chhung hian Pakistan-ah khelh a ni dawn a, India erawh Pakistan-ah an zin dawn lo - ICC-in neutral venue-a khelh an phalsak.

Tun thla tir khan India chuan ICC hnenah Pakistan-a an zin loh tur thu an tichiang a, khawvela cricket thuneitu sang ber hian Men in Blue tel loa Champions Trophy khelh hi an ngai ngam lo a, an khelh theih dan turin ruahmanna an siamsak.

India leh Pakistan te hi an inhal em avangin inelna lian tham tih loah chuan kum 2013 hnuah an inhmachhawn leh tawh lo a, kum 2008 hnuah India-in inkhel turin Pakistan an tlawh leh tawh lo.

ICC chuan, "Kum 2024-27 chhunga India leh Pakistan inkhel tur chu ram pakhat zawk zawkin an thleng a nih chuan neutral venue-ah khelh zel tur a ni ang," tiin thuchhuah an siam.

Champions Trophy bakah nakkuma India-in hmeichhe World Cup a thlen tur bakah India leh Sri Lanka-in kum 2026-a T20 World Cup a thlen ṭawm turte a tel a. Chutihrualin kum 2028-a Pakistan-in hmeichhe T20 World Cup a thlen turah pawh neutral venue-ah khelh a ṭul dawn.

Nakkuma neih tur Champions Trophy-ah hian inelna thlengtu Pakistan are bakah Australia, Bangladesh, England, India, New Zealand leh South Africa te an inel ang.