Inter tan hna a harsa lo

Marko Arnautovic leh Kristjan Asllani te goal hmangin Inter Milan chuan Udinese chu 2-0 in an hneh a, an phu ang ngeiin Coppa Italia quarterfinal an in pet kai.

Ningani zan khan Italy ramah ruah a sur a, khelmual hmingthang San Siro boruak pawh a vawt hle. Udinese lam tihsual vanga ball changtu Mehdi Taremi chuan striker Arnautovic tan an goal khatna a siamsak.

Austrian striker Arnautovic hian inkhel tir lamah penalty hlawh chhuakah a ingai a, mahse VAR hman a nih hnuah hnawlsak a ni. Arnautovic chuan, "Season kal laiah ka inkhel tam tawk lo a, inrintawkna neih pawh a harsa.

"Mahse, ka ṭhiante puihna ka dawng ṭha em em a, an zarah a hmawr bawktu ka ni," a ti. Inter hian striker ṭha Lautaro Martinez an nei, ani hi a dam a nih phawt chuan midang tan hmun chan tam theih a ni lo ang.

Coppa Italian nomawi vawi kua chawi tawh Inter hian quarterfinal-ah chuan Lazio an hmachhawn dawn. Quarterfinal hi nakkum February-ah khelh tur niin, inkhel dangah AS Roma leh Atalanta te an inhmachhawn ve thung dawn a ni.