Liverpool-in Mbappe lung an dum

Paris St-Germain striker Kylian Mbappe chuan Liverpool chu 'khawl' ang mai an nih thu a sawi a, hetihrual hian Real Madrid pan tur anga sawi thawm awm chu a pha thung. Kum 21 mi striker chuan, "Liverpool hnathawh hi a ropui takzet. Khawl hah thei lo ang mai an ni a, a ngai angin an kal pat reng mai a ni. 

"League-ah an la tlawm miah lo! An inkhel en mai chuan awlsam hmel deuhin a lang a, mahse a awlsam hauh si lo. Inkhelah an rilru zawng zawng an pe a, ni thum danah match nei reng mah se an chak zel a nih hi. 

"Mi zawng zawngin Liverpool inkhel an en a, Reds lakah kan team hian eng nge kan tih theih ang? tiin an hlir ṭhup reng a, hei hi buaina tham a ni. Mahse, he team hian squad leh manager ṭha tak an nei a ni," a ti. 

Mbappe hian kum 2017 khan pound maktaduai 165.7-in PSG hi a zawm a, tun hnaiah Real Madrid nen nasa taka sawizawm a ni leh mek. Mahse, French striker chuan, "Mi zawng zawngin Real chungchang an sawi a, keipawhin ka naupan lai chuan ka sawi ṭhin alawm. Mahse, tunah chuan player puitling ka ni tawh a, Real chanchin sawi hun a ni lo tih ka hria. 

"Real chungchang tunah hian sawi ta ila, chumi ringawt chu in buaipui ang a, PSG tan a ṭha lo a ni. PSG tan 100% ka pe a, he club hian hma sawn zel se ka duh takzet. Tun hi ka hma hun sawina tur niin ka hre lo," 

tiin a sawi.