Copa America A bul ṭan nan Chile-in Ecuador hneh

Zirtawpni zing khan Copa America 2015 chu khelh ṭan a ni ta, a thlengtu Chile chuan Arturo Vidal leh Eduardo Vargas te goal khung hmangin Ecuador chu 2-0 in an hneh.

Brazil leh Argentina te angin player langsar tam lo mah se Chile hi a thlengtu an nih bakah Alexis Sanchez, Arturo Vidal leh Eduardo Vargas te an neih avangin cham­pion thei tura rinkai zingah an tel a, kum 99 zet an champion tawh loh hnuah champion an tum ruh hle.

Copa America ope­ning match-ah hian Sanchez-a'n Chile tan inkhelh ṭan tirhah chance ṭha a hlah a, QPR player hlui Mauricio Isla-a'n Ecuador tan hun ṭha a hmang ṭangkai bik lo.

Minute 67-naah Juve midfielder Vidal-a'n Ecuador striker Miller Bolanos laka a penalty hlawhchhuah chu goal-ah a chantir nghal. Ecuador forward Enner Valencia-a'n crossbar a tauh ber a, Chile an him hram.

Minute 84-naah Arse­nal forward Sanchez thawhrah sengin Var­gas-a'n Chile goal hnih­na a khung a, goal dang a luh belh tawh lo a, hun tawp hma hretin Chile midfielder Matias Fernandez chu hnawhchhuah a ni.

Kum 55-a Upa Chile manager Jorge Sampaol chuan, "Ecuador khan min ti mangang hman hle. First half-ah khan hlauhawm tak taka kan tlarhnung an chhaih buai avang leh goal kan thun hnuah pawh na taka min nawr zel avangin a manganthlak ve hle. Mahse ka naute an buai phah lo avangin ka lawm a, kan hun ṭha neih hmang ṭangkai vek thei lo mah ila chakna tur goal an khung avangin ka lawm a ni. Bul kan ṭan chhe hran lo e," tiin a sawi.

Chile hian June 15 hian an group match hnihna chu Mexico nen an khel leh anga, match hmasa bera chak lo Ecuador hian Bolivia an hmachhawn ve leh thung ang.