Oman hmaah huaisen takin India an tlawm

FIFA ranking-ah India leh Oman inkarah ram 40 zet an awm a, Ningani zan khan ram inthlau tak pahnih hi an intawng a, ram pahnih dai dantu chu goal khat chauh a ni.

Sree Kanteerava Stadium, Bangalore-ah Oman-in India 2-1 in an hneh a, Group D inkhel dangah Guam-in an khelmual Guam National Football Stadium-ah Turkmenistan 1-0 in an hneh bawk.

2018 World Cup leh 2019 Asian Cup Qualifiers Group D-ah team panga an awm avangin rinkai Iran an la khel lo. India hian Thawhlehni khian Guam an hmachhawn dawn a, nizan khan Delhi Airport aṭangin Guam lam panin an chhuak.

Inkhel chu

World Cup khel tur zawnna inkhelah second 25 chiah a la ral hman tihin Oman-in India player-te ball khawih ve hauh hmain Qasim Said hmangin hmahruaina goal an khung. Mikhual team Oman-in inkhel an thunun zui a, amaherawhchu minute 26-naah Sunil Chhetri-a'n defender tihsual zarah mawi zetin India tan a sut a, Premier League-a hming chher tawh keeper ṭha Ali Al-Habsi meuh pawhin dan ngaihna a hre lo. Chhetri goal ropui hi defender Dhanachandra Singh penalty chawi vangin a hlutna tla hniam a, minute 40-naa midfielder Emad Al Hosani penalty hmangin Oman 2-1 in an chak.

India coach Stephen Constantine-a'n Hnahthial tlangval Jeje Lalpekhlua aiah Bengaluru FC duo Sunil Chhetri leh Robin Singh te chu tlar hmaa inkawp turin a thlang zawk a, Mizote chhuanvawr Jeje-a'n starting eleven chang lo mah se MPL1 best midfielder Rohmingthanga nau Lalchhuanmawia Fanai-in a vawi khat nan India tan a khel a, Chhuantea hi left back-ah awm a, tlar hnungah Dhanachandra Singh, Rino Anto leh captain thar Arnab Mondah te nen goal venhim hna an thawk.

Rinlawk ang ngeiin I league best player Jackichand Singh-a'n mual ding lamah bul a ṭan a, vei lamah CK Vineeth awmin midfield laiah Sehnaj Singh leh Eugenson Lyngdoh te an inkawp a; keeper-ah Norway club Stabaek tana khel Gurpreet Singh aiah tawnhriat ngah zawk Subrata Paul chu hman a ni. English coach Costantine-a'n match hnuhnung bera Nepal nena an inkhelh ṭum aṭangin player paruk ngawt a ti danglam a; inkhel pawimawhah player paliin a vawi khatna atan ram tan an khel bawk.

Inkhel ṭan chiaha India player-te con­centration hloh Oman player-in an hmang ṭangkai a, Bengaluru wing back Rino Anto-a positioning dik loh vangin Oman forward Said-a'n second 25 lekah a pet goal nghal.

Oman an chungnung a, minute 10-naah vei lam aṭangin Mohsin Al Khaldi-a'n ṭha zetin a pet a, India no. 1 keeper Subrata Paul-a'n a nam over ṭha hle. Oman an che ṭha zel a, Eid Mohammed leh Al Khaldi te inthlawp ṭha mah se Lengpui tlangval Chhuantea zarah India an him hram. Minute 26-naah India hun a thleng a, Oman defender ball pet sual chu India vice captain Chhetri-a'n remchangah lain a ke vei lamin goal sirah tak a dah a, goal ban perin a lut.

Minute 38-naah Mohun Bagan left back Dhana-a'n defence laia khelh a bel tawk lo tih a lantir leh a, ṭul lo takin Oman midfielder Al-Farsi lakah penalty a chawi. Oman club Saham forward Emad Al Hosni chu referee Ko Hyung Jin-a'n penalty pet nawn tir mah se a hlah duh lo, 2-1 a ni. First half tawp hma hretin Manipuri defender Dhana-a'n Oman forward Aziz Al-Muqbali penalty area-ah a tlawh thlu a, referee-in Al-Muqbali chu tlu derah ngaiin yellow card a pe, India an him hram.

Second half-ah Oman bawk an chungnung a, vanduai zawk erawh India an ni - an goal khung pawm a ni lo. Minute 67-naah training ground ang thlapin corner kick a pet a; Eugeneson, substitute Pune FC midfielder Ganesh leh CK Vineeth te thawhrah chu Oman defender Sallam Al Mukhaini-a'n an lamah a ti lut a, assistant referee-in offside position-a awm Robin Singh chu inrawlh vea a ngai avangin goal-ah pawm a ni lo.

Minute 83-naah Jeje a rawn lut a, Mizo tlangval hian field chhungah hun hmang rei lo mah se final whistle rik hma thlengin theihtawp a chhuah a, pressure a pek ṭhat zarah India game a ṭha sawt. Injury time-ah Chhetri-a'n penalty a beisei a, referee-in thutlukna dik siamin a penalty spot a kawk lo. Hemi hnu hian Oman goal khung chu offiside vangin pawm a ni lo a, hun tawp zuiin India 1-2 in an chak lo.

Engnge an sawi?

India left back Lalchhuanmawia chuan, "Team ṭha tak an ni a, ranking ang zawnga kan lo dah san viau ai chuan kan khel thei phian chuan ka hria, inkhel erawh an thunun khawp mai. Combination an nei ṭha a, pakhat kan venin a dang an lo awl zel a, kan tluk lo deuh a ni. Chutihrualin kar khat chauh training kan nei a, khatichunga kan bei let thei kha a lawmawm khawp mai. Kan khelh danah coach pawh a lawm e," tiin Oman chungchang a sawi.

India forward Jeje chuan, "Khelhna hun ka nei tlem hret a, engmah tih theih ka nei lo. Theihtawp kan chhuah a, chak zo lo mahila kan result-ah hnualna tur a awm lo," tiin a sawi.

India coach Stephen Constantine chuan, "Kan goal khung an pawm loh chhan kha ka hre lo. Oman khan ball an chan chiah khan keini aiin theihna an ngah zawk a tih a lang a, chutichung chuan ka player-te kha ka chhuang takzet a ni. Tin, Bengaluru mipuite ṭawiawmnaah ka lawm takzet bawk," tiin a sawi.