MotoGP - Marquez-a tan fiahna
Nium khan Circuit de Catalunya-ah hian Repsol Honda rider Marc Marquez chu pakhatna niin World champion a ni zui bawk. Kuminah erawh Marquez hian beisei a pha rih lo hle a, Pathianni a tlan tur Catalunya Grand Prix-ah pawh hian hnehna chang tura rinkai a ni lo.
Tun dinhmunah Marquez hian point 69 hmuin table-ah pangana a ni mek. Marc hian a lallukhum humhim tur chuan tun kartawp intlansiakah hian hnehna a chan ngei a ṭhul tawh ang.
Kum 1989 khan Catalan Autonomous Government, the Montmelo Town Council leh the Royal Automobile Club of Catalunya te ṭangkawp chuan intlansiak tlankawng hi an siam ṭan. International level intlansiak hmasa ber chu kum 1991 khan Spanish F1 Grand Prix tlan ṭan niin kum 1996 aṭang khan Bike intlansiak neih ṭan a ni bawk.
Tun season-a hmahruai mektu Valentino Rossi tan Spain-a intlansiak hi thil thar a ni lo a, he hmunah hian MOtoGp bikah vawi nga hnehna chang tawhin ani aia chak tam an awm lo. Rossi tan a hmahruaina belh chhahna hun ṭha a ni ngei ang.
Tun laia rider ngaihven hlawh leh che ṭha ber chu Yamaha rider Jorge Lorenzo a nih avangin Pathianni pawh hian mipui mit fukna ber tur pakhat chu a ni leh ang. Tunhnai intlansiak pathum Spanish Grand Prix, France leh Italy-ah te pakhatna a nih fai vek avangin ani hi ngaihthah theih a ni lo ang.
An insiam ṭhat theih a beisei thu sawiin Marquez chuan, "Vanduaina hi a lo thlen laklawh chuan dan theih a ni ngai lo. Mahse, mihringin kan theihtawp a lo inbuatsaih hi kan tih ve tur a ni. Thawhṭanni khan kan bike enchhinna hun kan nei leh a, kan chak tawk lohna leh fel lo lai awmte kan sut kian tawh avangin tunah chuan beiseina kan nei sang tawh hle. Yamaha nena kan inkar zau lutuk tawh anga lang hi ka ti zim thei ngeiin ka ring," tiin a sawi.