Hmeichhe WC-ah a thlengtu Canada-in beisei phak lo
Nimin zing khan hmeichhe World Cup-ah inkhel hmuhnawm tak tak hmuh tur a awm a, World Cup thlengtu Canda-in New Zealand 0-0 a in draw puiin chak result an hlawhchhuak zo lo.
Canada leh New Zealand inkhel hi minute nga an khel hman awrh tihin ruahpui vanawn sur leh nasa taka ṭek tlak avangin tihtawp lailawk a ni a, darkar chanve hnuah chhunzawm a ni.
New Zealand hmeichhe lamin penalty hlawhchhuak mah se Amber Hearn chuan crossbar a pet per avangin goal inpe loin inkhel hi an ṭin.
Germany an chak zo lo
Vawi hnih hmeichhe world champion ni tawh Germany-in Norway an hneh zo lo a, nimin zing inkhelah 1-1 in an inhnehtawk.
Inkhel ṭan aṭanga minute rukna lekah Germany-in Anja Mittag hmangin goal hmahruai an khung nghal a, mahse minute 61 naah Norway tan Maren Mjelde chuan an si phurh sutna goal rawn khung ve lehin 1-1 in an ṭin ta a ni.
Ivory Coast an tla
Ange Nguessan chuan minute li na lekah Ivory Coast hmahruaina goal khung mah se Thailand-in Orathai Srimanee goal hnih hmang leh Thanatta Chawong goal khat thun hmangin an chhanglet.
Ivorian hmeichhe team tan Josee Nahi chuan goal khat dang khung ve leh mah se goal dang an khung belh theih tawh loh avangin Thailand lakah 3-2 in an tlawm ta a ni. An match hmasa bera Germany laka 10-0 a tlawm Ivory tan World Cup-ah beisei tur a awm tawh lo.
China-in Netherlands an barakhaih
Asian team Thailand an chak a, China pawhin chak tura mi tam zawkin an rin Netherlands chu 3-1 in an hneh ve bawk.
Inkhel inhnehtawk takah hian team pahnihin goal an khung thei lawk lo a, minute 90 naah Chinese striker Wang Lisi chuan goal awmchhun khungin Netherlands tan chhanletna hun a awm tawh lo.
Chak lo tura ngaih zawk team-in hnehna an chang ta a ni.