Mercedes Cup quarterfinal-ah Nadal
June 9 aṭanga khelh ṭan Mercedes Cup-ah Rafael Nadal chuan Marcos Baghdatis hnehin quarterfinal a invaw tling.
Stuttgart a inkhelah hian kum 29-a upa Nadal hian darkar hnih leh minute 40 chhungin harsa ang reng takin 7-6 (7-5), 6-7 (4-7), 6-2 in Baghdatis hi a hneh a ni. French Open quarterfinal a Novak Djokovic a hneh loh hnua inkhelh lehna hmasa berah Nadal hi set hnihnaah a talbuai deuh a, mahse set hnuhnung berah erawh a insiam rem thei.
Grand Slam vawi 14 champion tawh Nadal hian quarterfinal-ah chuan Bernard Tomic a hmachhawn leh ang. Tomic hian Tommy Haas chu 7-6 (8-6), 6-2 in a lo hneh ve bawk.
Second round-a bye Nadal chuan, "Grass a inkhelh hi chu a awlsam lo. Chet ran a ngaih bakah ball vuak nat a ngai em em a, chuvangin chet sual theih tak a ni. Baghdatis kha player ṭha tak a nih avangin chak zawk nih pawh a phu a, ka vannei hlauh zawk," tiin a sawi.
Tun dinhmunah Nadal hian kum 10 chhunga a dinhmun hniam ber lai tawkin World rankingah 10 na a ni mek. Tun thla tawp a khelh ṭan tur Wimbledon inbuatsaih nan Mercedes Cup-ah hian a chet ṭhat a pawimawh hle ang.