FIFA buaina Fiamthu thawh vangin FIFA PR Chief ban a ni

FIFA communications director Walter De Gre­gorio chu Swiss Television channel-in an kawmnaah a fiamthu a lo sang deuh a, a hna aṭangin FIFA president Sepp Blatter chuan a chawlh tir.

Gregorio hian Swiss Television chat show Schawinski-ah tunhnaia FIFA buaina chu fiamthu thawh nan a hmang a, "FIFA president, secretary leh communications director te chu car-ah chuangin kan zin kual a, motor hi police in an khalh a ni," tiin FIFA hotu pathumte chu police-in an duh duh dana an hruai kual mai mai thu fiamthuin a sawi a ni.

FIFA thuchhuak chuan De Gregorio hian a hna hi ama thuin a bansan niin an sawi a, mahse Sepp Blatter-a thupek anga ban niin khawthlang media te chuan an report thung.

Gregorio hian Blatter ang tho in kumin kum tawp thleng chu a hna hi ala chelh chhunzawm rih dawn tho a ni.

Kum 50-a upa De Gregorio hian September 2011 aṭangin FIFA communications director hna a chelh ṭan a, tunhnaiah Blatter-a thlawptu leh rinrawl zinga mi nen an inhmuh thiam loh avangin president kalchhuak tur nen hian boruak an lo nei tawh sa nia sawi a ni bawk.

FIFA buaina hian ziaawm lam a pan tak tak rih dawn lo niin a lang a, European Union huamchhunga ram hrang hrang te rorelna khawl European Parliament Ningania

ṭhukhawm chuan Sepp Blatter chu a office luah zui lova bang nghal tura nawrin tunhnaia eirukna thubuai lengvel chuan infiamna hmai a tibal takzet tih an sawi a, a ban ruala a office a chhuahsan nghal loh avangin FIFA hruaitu ṭha zawk thlanchhuahna kawngah pawh harsatna a awm thei dawn nia an hriat thu a sawi.

Blatter-a ban vanga FIFA president thar thlan hun tur pawh December 16-a neih tur anga sawi awm tawh mah se FIFA chuan July 20-ah special meeting ko in Blatter-a thlaktu tur thlanna hun hi an ruat chiang dawn nia sawi a ni. Beisei dan chuan FIFA president thar hi December-ah emaw February 2016-ah neih rin a ni.

Qatar World Cup lamin chan­chin thar an nei ve leh a, John Whittingdale, Britain Secretary of State for Culture, Media and Sport-in Qatar World Cup thlen tur hlih a nih tak thuta England lo inrinlawk a ngaih thu a sawi avangin London-a Qatar Embassy chuan Britain Foreign Office hnenah an lungawi lohna thu an thlen a, British sorkar lam hotute hian Whittingdale-a thusawi chu sorkar aṭanga chhuak leh ruahman a nih loh thuin an lo chhang a ni.