Cleveland dal rual loh Iguodala

NBA final Game 4-ah Cleveland Cavaliers guard Lebron James dah ṭhat a ni a, Golden State Warriors guard Andre Iguodala a langsar. Warriors 103-82 in an chak a, series-ah 2-2 in an inhnehtawk.

Quicken Loans Arena, Cleveland-ah Cavaliers a zawnin an chak thei lo. Oracle Arena-ah Thawhṭanni zing dar 5:30 khian Game 5 khelh a ni ang.

Zirtawpni zing inkhelah Warriors kawng tinrengah an chungnung a, Warriors coach Steve Kerr thusawi hian an khel dan hmang a sawi chiang hle. Chicago Bulls vanglaia player pawimawh ni pha Kerr chuan, "Tun ṭuma danglamna lian tak chu a hma ai khan kan thawkrim a, kan theihna zawng zawng kan lantir a ni,"a ti.

Kerr hian center Andrew Bogut aiah forward Andre Iguodala a luh tir a, Warriors-in first half-ah game rang zawk an khelh theih phah. Iguodala hian point 22 a score a, rebounds pariat a la a; first half-ah 54-42 in an inthlau tawh a, harsatna nei loin a khel tluan.

Iguaodala bakah MVP Steph Curry-a'n point 22 a khung a, Warriors chakna chhan erawh Curry chauh a ni lo. Team pumpui thawhrah a ni.

Cavaliers-in ṭum dang an pha lo, LeBron-a'n ball a chan apiangin pahnihin an veng zel a, point 20 chauh score-in tun final-a a chet chhiat ṭum ber a ni.

LeBron an ven avangin Cavaliers Timofey Mozgov-a'n hun awl a ngah phah a, point 28 zet score mah se team chak puina tham a ni lo.

Cavaliers-in chak lo chhuanlam tur an nei. All star-a lang pha Kyrie Irving leh Kevin Love an chhawr thei loh hnuah Game 3 leh Game 4-a che ṭha Matthew Dellavedova chu inhliam vangin zan lamah damdawi-in lama enkawl a ngai. Inkhelh laiin James-a'n camera lense a tauh avangin a mit ko a kak bawk nen ṭum dang an pha lo hi a mak lo.

Cleveland squad a chhah tawk lo a, vawi hnih ve ve an chak leh takah chuan rinkai zawk chu Warriors an ni. LeBron James leh Cleveland Cavaliers te Game 5-ah fiahin an awm ang.