Raheem Sterling Man City ngamna zat Liverpool-in an pawm lo
Liverpool chuan Manchester City-in pound maktaduai 25 a Raheem Sterling lei an dilna chu an hnawl.
City-in kum 20-a upa English winger an ngamna zat hi tam tham viau angin lang mah se Reds lamin an player duhawm hi man to tak lo chuan chhuah tir an phal lo a, pound maktaduai 50 an chhiar.
England international hian kum 2010 khan Queen Park Rangers aṭangin Liverpool hi a zawm a, kum 2017 thleng Anfield-ah contract nei mah se kar khata £100,000 hlawh tura Liverpool-in contract thar an zawrh chu April thla khan a lo hnar tawh.
Real Madrid leh Arsenal pawn an rim mek anga an sawi Sterling hi Liverpool boss Rodgers chuan chhuahtir tumna an neih loh thu sawiin Anfield-a kum hnih contract ala neih chu hmang zo tur angin sawi mah se pound maktaduai 50 a dawrtu an hmuh chuan English winger hi an chelh chhunzawm rengin a rinawm loh.
Manchester City hi tun nipui transfer-ah chet nat an tum hle a, club chairman Khaldoon Al Mubarak chuan Ningani khan player ṭha tak tak lakluh tuma an beih thu lo sawi tawhin a hnu lawkah Sterling an dawr thu hi hriat a ni leh ta a ni.
English player zinga City player awmchhun ni mek keeper Joe Hart chuan UEFA dan bawhchhiat loh hram duh vangin a club khelh mekna chuan English player ngei lakluh tuma an beih a rin thu alo sawi ve mek bawk. UEFA dan ang chuan Europe club hrang hrang squad tinah tualchhung player pakhat tal an awm a ngai a, Frank Lampard leh James Milner te'n an chhuahsan tawh bawk nen English player an mamawhna hi a sang hle a ni.
Manchester City player pawimawh Hart chuan, "UEFA dan avang hian kan clkub hruaitute chuan English player lakluh phawt hi hna hmasa berah an neih ka ring a ni," a ti.
Tunhnaiah Liverpool captain hlui Steven Gerrard chuan Liverpool-a cham zel chu Sterling tan a ṭhat ber thu a lo sawi chhuak tawh a, Real Madrid manager thar leh Liverpool boss hlui ni bawk Rafael Benitez chuan Reds winger hi Santiago Bernabeu lama sengluh pawi a tih loh thu a lo sawi tawh bawk.