Bungkawn leh Saron an champion
Lalramchhana Pachuau (Mapuia) Memorial Basketball Tournament chu Ningani khan khelh zawh a ni. Under 18 Boys-ah Bungkawn Veng an champion a, hmeichhe inelnaah Saron Veng an champion bawk.
Bungkawn hian final-ah Ramthar Veng chu 82-81 in an hneh a, Saron Veng hian a thlengtu Nursery chu 45-44 in an hneh.
Mipa inelnaah hian team 42 an tel a, hmeichhe inelnaah team nga an inziak lut bawk. Final khelh zan hian Nursery Veng basetball court khat tlat mipui an pungkhawm.
Saron Veng 45-44 Nursery Veng
Nursery Vengin final lut turin Khatla leh Chawnpui an hneh a, Saron Vengin final thleng turin Bungkawn an sawp.
Inkhel hmuhnawm takah Saron Veng tan Ruthi Ch. Ralte-i'n point 33 zet a lut a, team champion puitu niin point 8 score-tu Lalremruati’n a thawp ṭha viau bawk. Nursery Veng innghahna Wendy Ramthamawii leh ST. Lalchhanhimi ten 25 points leh 14 points luh mah se team chak nan a tawk lo. Saron Veng 45-44 in an chak.
Bungkawn 82-81 Ramthar Veng
Mipa Under 18 final-ah Bungkawn leh Ramthar ten game hmuhnawm leh ṭang tak an khel a, an in san chhawk zak zak hnuin Bungkawn point guard Vanlalthazuala chuan hun tawpah 'Buzzer' rik rualin a theh lut a, Bungkawn veng an champion.
Bungkawn hian 3rd quarter-ah point 14 zetin hma an hruai hman a, Ramthar Veng lamin 4th quarter-ah an lehthal a, a tawp thlengin an inum zui a, a tawpah Bungkawn an him hram.
Chakna basket khungtu Vanlalthazuala hian points 24 zet a lut a, Lalramzauva chuan point 16 a thehlut ve bawk. Ramthar Veng tan an innghahna leh 3 pointer Zonunsanga chuan 28 points thehlutin, Lalramsanga’n point 18 zet a score bawk.