Ka chhuahsan hnuah Totten-ham an tlachhia - Redknapp

English manager Harry Redknapp chuan a club enkawl ṭhin Tottenham Hotspurs chuan kum thum liamta chhung khan beisei an phak loh takzet thu leh an khel pawh entlak loh khawpa hmuhnawm lo a nih thu a sawi.

Kum 68-a upa ma­nager chuan, "Spurs manager ka nih chhung khan vawi hnih lai palina ka nihpui thei a, a aia sang zawk thleng thei dinhmunah pawh kan ding hial a ni," tiin a enkawl laia Spurs team chu an chet chhiat loh thu a sawi.

Kum li a enkawl hnua June 2012-a Tottenham-in an manager aṭanga an ban tak Redknapp chuan, "Ka chhuahsan hnuah Tottenham hian beisei an phak lo takzet a ni," a ti.

Spurs hian kum 2010-a a vawi khat nana Champions League khelhpuitu manager hi an ban hnuah manager pathum lai an nei leh tawh a, July 2012 khan Andre Villas-Boas lalutin Chelsea manager hlui hian an beisei ang result a pek theih loh avangin December 2013 khan an ban ve leh nghal. Tim Sherwood-a'n thla nga a daih hram a, Southampton boss Mauricio Pochettino an lalut ve leh a, Argentine manager hian a season hmasa berah Premier League-ah pangana a nihpui a ni.

Redknapp chuan Pochet­tino chungchang sawilangin, "Tuna Spurs manager hi chu manager ṭha tak a ni a, ka duh zawng tak a ni. Mahse, a team enkawl mek hi kan en erawh chuan an khel hi a hmuhnawm lo em em a ni," a ti.

London club chu sum hman thiam loah Redknapp chuan puhin, " Gareth Bale leh Luka Modric an hralhna aṭang ringawt pawhin pound maktaduai 120 an lalut a, an hman dan erawh nuihzatthlak tak a ni. An player sign zawng zawng te hi ka ngaihdan chuan chhiatna thlentu an ni," tiin a club hlui lakah ṭawngkam a duhtui lo hle.