Copa America Champion tum Argentina inlan dawn
Pathianni zing dar 3:00 hian Argentina chuan Copa America-a an group match hmasa ber Estadio La Portada-ah Paraguay nen an khel ang.
Copa America-ah hian Argentina hi vawi 14 zet champion tawh mah se kum 1993 hnuah an la champion leh loh avangin nomawi chakin an tuihal tawh hle. Champion hnem ber Uruguay record tluk turin Argentina hian vawi khat champion bak an ngai tawh lo.
FIFA 2014 World Cup final-ah Mario Gotze goal khat thun hmangin Argentina-in Germany an hneh lo a, tun thlengin an rilru na a la dam lo. An tawrhna ti reh tur leh an hliam ti dam turin Copa America-ah champion an tum ruh hle.
Argentina tlar hmaah hian Premier League top scorer Sergio Aguero a awmin a rinawm a, ani thlawp tur hian Lionel Messi leh Angel Di Maria te an awm avangin an chhe thei lo.
Paraguay tlar hmaah hian Blackburn Rovers leh Manchester City striker hlui Roque Santa Cruz inlan tura beisei a ni a, ani bakah hian Paulo Da Silva, Oscar Romero, Raul Bobadilla, leh goalkeeper Justo Villar te hi innghahna tham an ni hlawm ang.
Argentina hian nikum nipui laia a contract hmang zo manager Alejandro Sabella aiawh turin Gerardo Martino an lalut tawh a, Barcelona boss hlui hian South America-ah tawn hriat a ngah tawh avangin an beiseina siam sak tu pakhat a ni bawk. Martino hian an khingpui tur Paraguay hi kum nga chhung ngawt a lo enkawl tawh a, kum 2011 Copa America-ah khan final thlenpui mahse Uruguay lakah an vanduai.
FIFA Ballon d'Or vawi li dawng tawh kum 27-a upa Messi chuan champion an tum thu sawiin, "Kei leh kan ram hian Copa America champion nih hi kan duh takzet. Nikum World Cup Brazil-a neihah khan kan vanduai avangin kan champion lo a, tun thlengin ka rilru ala nain kan hliam ala dam thei lo. Kan rilruna tidam turin Copa America champion a ngai a ni. Chumi tur chuan kan match hmasa ber aṭang hian a ṭha thei ang bera kan khelh a ṭul dawn," tiin an match hmasa ber an khelh hma aṭangin champion an duh thu a sawi der tawh.
Barcelona-a season duhawm tak hmang zo hlim Messi chuan an squad chungchang sawi chhunzawmin, "Kan squad hi tlarhnung ber aṭanga a hmasa ber kan thlir chuang hming langsar tak tak an kat nuk mai. Champion nomawi chawi turin ka ṭha tawk hle chuan ka hria. Amaherawhchu kan elpui tur team dangte pawhin player ṭha tak tak an kawl khawm ve ṭeuh tho a ni tih kan hriat tel a ṭul hle," tiin a sawi.
Messi hian tun season-ah Barcelona tan match 57 a khelh aṭangin goal 58 khungin champion nomawi pathum a chawi pui. Hetihlai hian Paraguay coach Ramon Diaz chuan Messi hi player ṭha leh thiam bik chu ni ngei mah se ven bik an tum loh thu a sawi.
Argentina hi Group B-ah Paraguay, Uruguay leh Jamaica te nen an awm ho a ni. Group B a phnihna hian Brazil awmna Group C a pakhatna an hmachhawn theih dawn avangin Group hma hruaitu nih tum tan point hloh loh a pawimawh ang.