Barcelona hnehtu Atlético-in hma an hruai

Krismas a thlen dawn meuh chuan La Liga-ah hmahruaitu thar kan nei ta - Atletico Madrid chuan an mikhualna ramah 2-1 in hmahruaitu Barcelona an hneh a, Spanish top flight league-ah hmahruaitu an ni zui.

Barcelona hian Pedri hmangin goal hmahruai an khung a, Atletico-in Rodrigo de Paul hmanga si phurh sutin, hun pek belhah substitute Alexander Sorloth chuan chakna goal a khung - Atletico hian point thumin Barca an tlansan a, match khatin an khel tlem zawk bawk.

Catalan club hi table-ah pahnihna an la ni a, mahse, nizan khan Real Madrid inlanin, Carlo Ancelotti naute hian hnehna an chan chuan Barca hi pathumnaah an tla thla ang - an result kan hre hman lo.

Inrinni zana Barca khelmuala inkhelah, mualneitu lam hian goal an khung hma a, Pedri chuan minute 30-naah Gavi siamsak a khung - Barca-in inkhel an thunun zui a, chance pawh an nei tam.

Mahse, Catalan club hian a pawimawh ber goal an khung thei lo a, an tuar zui. Rodrigo de Paul chuan minute 60-naah Atletico tan si phurh a sut a, tun hnaia 'form' em em mai Sorloth chuan hun pek belh minute ruknaah chakna goal a khung zui - Gavi, Fermin Lopez, Pedri leh Raphinha ten an chance neih goal-a chantir loh an ui vawng vawng ang.