Kum 2024 thlirletna

3rd NE Olympic Games 2024: Mizoramin gold 17 hawnin, palinaah an awm

3rd NorthEast Olympic Games 2024 chu March 18-23, 2024 chhung khan Nagaland-a district pathum Kohima, Dimapur leh Chumoukedima-ah neih a ni a. Mizoramin gold 17 an hlawh chhuak a, inelna vawi thum an neih tawha gold medal an hlawhchhuah tam ber ṭum a ni a, silver 15 leh bronze 27 la bawkin a vaia medal an lak zat chu 59 a ni.

A vawi nga nan Aizawl FC an champion

LZ Juice MPL11-ah Victor Lalbiakmawia kaihhruai Aizawl FC chu hneh loh nei loin an champion a, MPL record thar an siam. I League club hian October 15, Thawhlehni zan khan final-ah Mizoram Police chu minute 36-naa Lalawmpuia Sailo goal ropui hmangin 1-0 in an hneh.

Aizawl FC-in tun season match 17 an khelh aṭangin vawi 13 hnehna an chang a, vawi li an khingpui nen an inhnehtawk - hneh loh an tawng lo. I League club-in a vawi nga nan MPL nomawi an chawi a, foreigner tel loa an champion hmasak ber a ni.

Mizoram thlen chin semifinal

77th National Football Championship for Santosh Trophy-ah Mizoramin semifinal an thleng a, champion zui ta Services lakah 2-1 in an chak lo. Inelna hi February 21 - March 9, 2024 chhung khan Yupia, Arunachal Pradesh-ah neih a ni.

Mizoram team hi coach Lalsangzuala Hmar leh manager K. Lalenghluna (L) ten an hruai a, kum 2018 hnua final round an khelh lehna hmasa ber a ni. Inelna hi 2023-24 season a ni a, tun season 2024-25 ah erawh Mizoramin final round an lut pha lo.

Mizoram hian GGNU Sports Complex, Amritsar-ah nikum October thla khan qualifying round an khel a, match hmasa berah Services (2-1) in hneh lo mah se final round lut turin group-a awm dang DNH&DD (5-0), Sikkim (1-0) leh Uttarakhand (1-0) leh Pondicherry (6-0) an hneh.

Final round hi kumin February 22 - March 9, 2024 chhung khan Yupia, Arunachal Pradesh-ah khelh a ni a, Mizoram hi Manipur, Delhi, Railways, Maharashtra leh Karnataka awmna group aṭangin pahnhna nichungin quarterfinal an lut. Knockout stage-ah Mizoram hian team ṭha Kerala nen hun pangngaia 0-0 a inhnehtawk hnuin penalty shootout-ah 7-6 in an vannei ta zawk. Semifinal-ah Mizoram hian Services an hneh lo a, chutihrualin kum 2018 hnua final round leh semifinal an khelh leh hmasak ber niin National Games khel turin an tling bawk.

MoGrip Supercross C'ship-ah Mizo tlangval Shaun

India rama bike intlansiak lian MRF MoGrip Supercross Championship-ah Mizo tlangval Shaun Lalremruata Chhangte chu 'private expert' class-ah pathumna a ni.

College Veng tlangval Shaun hian mahni sum sengin inelna hi a hmachhawn a, round hmasa pahnihna a tel lo chungin inelna pumpuiah pathumna a ni pha.

Inelnaah hi kumin kum tawp lam khan neih a ni a, round 3 hi October 27, Pathianni khan Bhopal, Madhya Pradesh khan neih niin Shaun hi private expert class-ah pahnihna a ni.

Inelnaah Shaun hian Hero XPulse bike a hmang a, an bike hi mahni sum senga zinpui zel a ngaih avangin senso pawh a san phah. November 10, Pathianni khan Pune-ah round 4 tlan a ni a, Shaun hi private expert class-ah pathumna a ni.

Bengaluru (November 17, Pathianni) leh Cochin (November 30, Inrinni)-ah round ngana (private expert class) leh round rukna (Indian Novice Class) te tlan leh a ni a, pathumna ve vein niin a pumpuiah pathumna an inhlangkai. Shaun hian inelna a hmachhawn chinah podium a lawn pha vek.

College Veng tlangval Shaun hi Mizoram aṭanga hetiang inelnaa tel hmasa ber a ni a, mahni sum sengin dai loh ram fangin result duhawm tak a hlawh chhuak. December 4, Nilaini khan Aizawlah rawn thlengin Amawii Hero bul tumin College Veng mipui leh MIMSA aiawhten an lo hmuak a ni.

Kolasib Town Jt an champion

GIG Motors MFA All Mizoram Inter Village Football Tournament 2024-ah Kolasib Town Jt an champion a, final-ah Ramhlun North an hneh. Hun pangngaiah team pahnih hi 2-2 in an inhnehtawk a, extra time-ah goal khat ve ve khung lehin penalty shootout-ah Kolasib 5-4 in an vannei ta zawk.

Kolasib hian feet nga zeta sang nomawi bakah nuai hnih leh sial an dawng a, fairplay award an dawn zarah Rs 50,000 an dawng tel. Team khaipa Paul Ramfangzauva chu best player a thlan niin goal riat khung thei mi panga zinga khel tlem ber Thenzawl Jt forward F. Lalhmangaihsanga'n top scorer chawimawina a dawng.

Sihphir Venghlun an champion

Mahindra XUV 3OO LPS Cup 2024, Inter Village Football Tournament-ah Sihphir Venghlun an champion. RG Stadium, Mualpuiah March 22, Zirtawpni zanah final hi khelh a ni a, Sihphir Venghlun leh Kawnpui Jt. te chu hun pangngaiah 1-1 a inhnehtawkin, penalty-ah Sihphir Venghlun hi 4-1 in an chak a, a vawi khat nan khua leh veng inelna football-ah an champion.