Milan leh Napoli an chak

Krismas hma Serie A an khelh hnuhnung berah AC Milan leh Napoli te chuan hnehna an chang a, boruak nuam tak hnuaiah hunpui an hmang thei dawn tihna a ni.

Inrinni zan khan Napoli hian an mikhualna ramah Genoa chu 2-1 in an hneh, mikhual team tan hian Andre-Frank Zambo Anguissa leh Amir Rrahmani ten goal an khung a, goal hnih an chhuah hnuah mualneitu lam tan Andrea Pinamonti chuan a khung ve bawk.

Napoli coach Antonio Conte chuan, "Genoa khelmual hi ka hrechiang a, tun hmain beiseina sang tak nena lut chung pawhin team lian an lo chesual fo tawh, chutiang hresa chung chuan fimkhur takin kan lut.

"Inkhel chanve hma lam kha kan khel ṭha em em a, chawlhlawk lai khan ka naute chu inthlahdah miah lo turin ka fuih. Mahse, goal khat chu kan chhuah ta tho," tiin a sawi.

Italian manager hian hnehna chang mah se, an inkhel pumpuiah chuan hmasawnna tur tam tak a la awm tih a sawi a, mahni goal venhim dan ṭha ber chu khingpuite na taka nawr a ni tih a sawi bawk, kum tharah goal tam zawk khung an tum ang.

Conte naute hian match 17 aṭanga point 38 hmuin Serie A hmahruaitu an ni leh lailawk a, mahse nizan khan Atalanta an inlan, anni hi an chak emaw point khat chauh pawh an hlawh chhuak a nih chuan a chung bera awm chungin Krismas an hmang dawn a ni.

Inkhel dangah AC Milan chuan Tijjani Reijnders-a goal khat hmangin Hellas Verona chu 1-0 in an hneh a, league match 16 aṭanga point 26 hmuin table-ah pariatna dinhmun an luah a, season thara Champions League khelh an tum zel.

Lazio pawhin an boruak fuh an chhawm nung a, an mikhualna ramah Lecce chu 2-1 in an hneh - point 23 neiin palina dinhmun an luah phak a, an chunga awmte an la hlat loh avangin Italian champion nih beisei ngam zingah an tel.