Zheng-i insawrbing dawn

Hmeichhe tennis Olympic champion lai Zheng Qinwen chuan Australian Open 2025 a ngaipawimawh hle a, season thara Grand Slam an khelh hmasak ber tur atan hian a insawrbing dawn tih a sawi.

A tirah chuan Zheng hi United Cup khel tura ngaih a ni, mahse major tournament inbuatsaihna hun neih tam a duh zawk avangin United Cup pawh a khel dawn lo.

Chinese nula Zheng hian season hmasa kha a hmang ṭha hle. Paris Olympic gold medal a lak bakah Tokyo leh Palermo Open nomawi a chawi a, inelna lian dang Wuhan Open leh WTA Finals-ah te pahnihna dinhmun a luah phak bawk.

Season hmasa lama match 68 kheltu Zhang chuan, "Kum 2024 chhungin match ka khel tam em em a, chawlhna hun pawh ka nei lo a ni ber mai, chuvangin hahchawlhna hun neih belh hret ka mamawh.

"Nakkuma January thlaa a khelh tur United Cup hi ka ngaihhlut loh vang a ni lo, theih ni se la chuan inkhelh ngei pawh ka duh. Mahse, a hnu lawkah Australian Open a awm zui dawn, ka taksa dinhmun ngaihtuah tel a ngai," tiin a sawi.

Tennis season a zo fel tawh a, season thar atan inbuatsaihna an nei chho leh mek tawh. Nakkum January thla laihawl hian Grand Slam hmasa ber Australian Open an khel ṭan leh ang.