National Games 2025 Football-ah Mizoram an tel dawn

All India Football Federation (AIFF) chuan 28th National Games 2025-a football inelnaa tel tur team pariat a puangzar a, mipa inelnaah Mizoram an tel dawn. Inelna hi February thlatir hian Uttarakhand-a neih tur a ni.

Mipa inelnaa tel tur hi Santosh Trophy vawi 77-naa che ṭha aṭanga thlan a ni a, Mizoram hi coach Lalsangzuala Hmar leh manager K. Lalenghluna (L) te hoin semifinal an thleng. National Games-ah hian quarterfinal lut chin an tel dawn a, Railways an tel ve theih loh avangin an aiah inelna thlengtu Uttarkhand an tel thung ang.

Inelna hmachhawn turte chu champion Services, pahnihna Goa, semifinalist Mizoram leh Manipur, quarterfinalist Kerala, Delhi leh Assam bakah inelna thlengtu Uttarkhand te an ni.

Football inelna bik hi Haldwani, Uttarakhand-ah February 4, 2025 aṭanga neih tura ruahman a ni a, team khatah hian player 22 bakah official panga a ziahluh theih ang.

Mipa inelna bakah hian hmeichhe inelna neih a ni dawn a, ni khatin an ṭan hma dawn. Hmeichhe inelnaah Mizoram an tel lo a, inelna thlengtu Uttarakhand bakah Manipur, Haryana, West Bengal, Tamil Nadu, Odisha, Delhi leh Sikkim te an inel dawn a ni.