Bayern leh Leverkusen an chak chiang

Bundesliga-ah champion lai Bayer Leverkusen leh champion tura rinkai Bayern Munich ten goal nga ve ve khungin an khingpui an sawp ve ve. Bavarians hian an elpui RB Leipzig chu 5-1 ngawtin an sawp a, Xabi Alonso hoten SC Freiburg 5-1 thoin an hneh ve bawk.

Nizan khan league match hnih khelh leh a ni a, Bundesliga-in thlasik chawlh an nei chhunzawm dawn. January 10, Zirtawpni zanah a khelh chhunzawm leh a ni dawn a, Leverkusen leh Borussia Dortmund te an inkhel nghal ang.

Bayern-in bul anṭan ṭha a, second 28-na lekah Harry Kane leh Leroy Sane te thawhrah sengin Jamal Musiala-a'n goal hma hruai a khung. Mahse, minute hnihnaah Benjamin Sesko hmangin Leipzig-in an sut lehnghal.

Inkhel inhnehtawk tura ngaih ni mah se a thiam zawk Bayern an dingchang. Minute 25-naah Sane ball bawk chu Konrad Laimer-a'n a khung a, minute 36-naah hla zet aṭangin Joshua Kimmich-a'n hla takin aṭangin a khung. Second half-ah pawh Bayern bawk an chungnung a, Sane-a'n ṭha zeta minute 75-naa a khung hnuah minute 78-naah Alphonso Davies-a'n a tauh goal leh bawk.

Champion lai Leverkusen pawhin nomawi chan mai an tum lo a, Patrick Schick-a goal li khung leh Florian Wirtz goal class hmangin Freiburg 5-1 in an sawp. Alonso hote hian point 36 hmutu Bayern chu point li chiahin an pha lo.