Goa, Mumbai leh East Bengal an chak

Kartawp Indian Super League inkhelah hmahruaitu Mohun Bagan an tlawm a, FC Goa chuan 2-1 in an hneh. Goan club tan Brison Fernandes chuan goal hnih khungin, Bagan tana Dimitrios Petratos goal khungin awmzia a nei phak lo.

Bagan tan Lalengmawia Ralte (Apuia) chuan inkhel bul ṭanin, Goan club tan Ayush Chhetri chu bench aṭangin a lut. Bagan chak zawh loh thu hre sain, Inrinni zanah Mumbai City an inlan a, 2-0 a Chennaiyin hnehin, beiseina an nei thar ve leh ta.

Mumbai club tan Nikolaos Karelis chuan inkhela goal awmchhun a khung a, point ruk chauhin hmahruaitu Bagan an thlau zui. Mumbai tan Hmingthanmawia Ralte (Valpuia) leh Lallianzuala Chhangte ten inkhel bul an ṭan a, Chennaiyin tan PC Laldinpuia, Laldinliana Renthlei leh Lalrinliana Hnamte ten inkhel bul an ṭan vek.

Inrinni zan inkhel dangah Khalid Jamil-a'n a club hlui East Bengal a lenchilh a, mahse, a club enkawl Jamshedpur FC a chakpui zo lo. An mikhualna ramah 1-0 in an tlawm a, Kolkata club tan Dimitrios Diamantakos chuan inkhela goal awmchhun a khung.

East Bengal tan Lalchungnunga'n inkhel bul ṭanin, David Lalhlansanga chu bench aṭangin a lut bawk.