Krismas vuak vetah inkhel hmuhnawm

European football-a league ngaihven hlawh La Liga, Bundesliga, Ligue 1 leh Serie A ten Krismas chawlh an hmang vek dawn a, Premier League erawh an chawl ve dawn lo - Krismas ni tak an chawl ang a, a tuk ruai ṭheh ni aṭangin match a awm lehnghal dawn!

La Liga hi nizanah khan Krismas hmaa an match hnuhnung ber khelh a ni a, January 3 zanah Valencia leh Real Madrid an inkhel ang a, January 10 zanah club dangin an chhunzawm ve leh chauh ang.

Ligue 1 hi Ningani zan khan Krismas hmaa match hnuhnung ber khelh a ni tawh a, January 3-ah an khel ṭan leh ang. Match ngaihven sawi hluai tur a awm lawk dawn lo.

Serie A hi December 23 thleng match a awm dawn a, December 28-ah lo kirin, December 30 thleng match a awm ang a, kum thar chawlh an hmang leh ang. Kum thar lawm zawhah, January 4 zan aṭangin match a awm leh ang.

Bundesliga bik hi chawlh hmang rei ber tur an ni a, nizan khan Krismas hmaa an match hnuhnung ber an khel ang a, December 10-ah an lo kir leh dawn chauh.

Premier League lamah Vanglaini chanchinbu chhuah loh chhungin match hmuhnawm tak en tur a awm nual dawn. Vanglaini hi December 23, Thawhṭanni thleng a chhuak ang a, January 4, Inrinni aṭangin a chhuak leh ang.

December 30, Thawhṭanni zan dar 1:30-ah Manchester United-in Newcastle United an mikhual dawn a, January 4, Inrinni zanah Tottenham Hotspur chuan Newcastle United an mikhual dawn bawk.

Kum tira inkhel ngaihven hlawh ber tura chhal ngam chu Liverpool-in January 5, Pathianni zanah an khel dawn a, Manchester United an mikhual ang - team pahnih hi an dinhmun inthlau viau rih mah se, club inhal tak an nih avangin an inkhel hi ngaihven hlawh a ni reng tho.