Man United-in hma an sawn lo

Ruben Amorin-a hnuaiah pawh Manchester Unitrd-in result ṭha neih an la harsat a, Pathianni zan khan Bournemouth 3-0 in an hneh lo. Old Trafford-a mualneitu khelh dan leh result thlir chuan hmasawnna hmuh tur a awm.lo a, inkhel entute pawhin player-te an an au el hial.

Cherries tan Dean Huijsen-a'n first half-ah ṭha zetin a tauh lut a, second half-ah Justin Kluivert-a'n penalty aṭanga a khung bakah Antoine Semenyo-a'n a khung belh bawk. Andoni Iraola hote hian point 28 hmuin panganaah an awm a, Man United erawhin point 22 hmuin 13-naah an awm pha chauh.

Man United-in beiseina nen Amorim lalut mah se Portuguese manager pawhin tun dinhmunah chuan danglamna a thlen tam lo. Chutihrualin Erik Ten Hag an ban avanga zângnadawmna pek a ngaih avang leh Amorim la chhuak tura sum an sen bawk avangin inkhel en man pawh £66 niin fan-te hnenah inngaihnathiamna (concession) a awm tawh lo.

Inkhel en man a to sawt a, result ṭha an neih loh bawk avangin club ṭantute an lawm lo. Amorim chuan, "Tun dinhmunah chuan engkim a harsa a ni. Club lian, Manchester United tan chuan manhni muala 3-0 ngawta tlawm chu pawm thiam a harsa a, tute tan mah hriatthiam theih a ni lo," tiin an result avanga a thinur thu a sawi.

Man United hian Amorim hnuaiah khelh dan thar neiin tlarhnungah defender pathum an hmang a, wing back pahnih chhiar telin defender panga an hmang tihin a sawi theih bawk. Cherries an hmachhawn ṭum hian Tyrell Malacia chu left wing back-ah awmin, a hna a tlin lo. January transfer-ah Man United hian left back thar an lakluh ngei a rinawm.

Chutihrualin tlarhma lam pawh a bil tho a, Cherries tlarhnung tan Joshua Zirkzee a hnawksak pha lo. Midfield khaipa Bruno Fernandes pawhin team a uap zo lo a, mamawh hunah goal khung a harsat rih bawk. Man United hian December 26, Ningani zanah Wolves an tum ang.