Melbourne-ah Nadal a hrang

Rafael Nadal chuan nimin khan Australian Open-ah Hugo Dellien hnehin second round a lut a, hnehna chang turin harsatna a tawk lo - a khingpui lakah hian set thum an khelh chhungin game nga chiah a hloh.

Rod Laver Arena, Melbourne Park-a inkhelah Nadal hian 6-2, 6-3, 6-0 in hnehna a chang. World number 1 hian nomawi a chawi a nih chuan Roger Federer (20 titles) nih rualin mipa player Grand Slam nomawi chawi hnem an ni ang.

Nadal hian Australian Open final vawi nga a khel tawh a, mahse vawi khat chiah a la champion; season 11 liam ta khan Federer hnehin a champion. Nikum khan nomawi inchuhna inkhelah Novak Djokovic a ngam lo a ni. Thawhṭanni zan khan champion lai Djokovic-a'n a match hmasa ber a khel tawh a, Serbian tlangval hian Jan-Lennard Struff chu 7-6 (7-5), 6-2, 2-6, 6-1 in a hneh - vawi sarih a champion tawhna hmunah fiahna hautak a hmachhawn nghal.