A chung ber luahtu Liverpool

Liverpool-in Leicester City lakah goal chhuah hmasa mah se, Premier League champion an tum tih pholangin goal thumin an chhanglet a, table chung berah sang fal takin an awm chhunzawm zel.

Ruaiṭheh zanah Reds hian Leicester an mikhual a, Manchester United legend Ruud van Nistelrooy enkawl Foxes hian Jordan Ayew hmangin goal hmahruai an khung a, Anfield an ngawihtir.

Mahse, tun season-a European football team hmuhnawm bera chhal ngam Liverpool an talbuai duh lo - Cody Gakpo chuan chawlhlawk hmain mawi zetin si phurh sutna goal a khung a, second half-ah Curtis Jones leh Mohamed Salah ten khung ve lehin, 3-1 in an chak daih.

Salah hian Liverpool tan tun season-ah match 25 khelin goal 19 ngawt a khung tling ta der a, assist vawi 15 ngawt a nei tel bawk.

Liverpool hian league match 17-ah point 42 hmuin hma an hruai mek a, anmahni hnaih bertu Chelsea aiin point sarihin an sang zawk - match khatin an khel tlem zawk bawk.