Ka dinhmun a derthawng - Amorim

Manchester United head coach Ruben Amorim chuan club beisei ang result a neih theih loh chuan a him loh thu a sawi a, Portuguese manager chuan, "Min lei chhuak emaw, chhuak lo emaw pawh ni se, an beisei ang result kan pek loh chuan manager him kan awm tak tak lo.

"Mahse, a pawi lo, chu chu kan hna a ni miau alawm," a ti a, result ṭha a neih loh reng chuan United sawm chhuah ni mah se, ban theih a nih thu a sawi.

Manchester United hian an match hnuhnung pahnihah Bournemouth leh Wolverhampton Wanderers an ngam lo a, Amorim hoa match 10 an khelh tawhah vawi nga an tlawm - kum 1931 hnua Walter Crickmer hnua United manager bul ṭan chhe ber a ni! Crickmer hi khatihlai khan club secretary a ni a, United talbuai laiin team a enkawl thung.

Amorim chuan, "Manchester United manager tan hi chuan hahdam theih a ni ve lo. Ni e, he hmunah hian thla khat chauh ka la awm a, training session pali vel bak ka la kaihruai lo. Mahse, kan chak thei lo a, chu chu thil nihphung a ni," a ti.

United hian Thawhṭanni zan dar 1:30-ah Newcastle United an mikhual ang a, khualmualah Liverpool an lenchilh zui ang - hmabak a ko takzet.