Asia champion PC Lalrinpuii ropui taka hmuah a ni

Hockey Women's Junior Asia Cup-a India champion puitu zinga mi, Hnahthial nual PC Lalrinpuii chuan nimin khan Hnahthiak a thleng a, Hnahthial khawtlang mipuiten ropui takin an lo hmuak.

Hockey khel thiam Rinpuii hi Hnahthial hmar lam kawtchhuah Vawkpuilutar-ah hmuah a ni a, hemi hnu hian amah lawmna inkhawm Bazar kawnah hman a ni a, South Tuipui Bialtu MLA Jeje Lalpekhlua chuan he hunah hian thu sawiin, "Rinpuii hlawhtlinna chhan hi a thawhrimna leh tlo vang a ni," a ti a, mi inngaitlawmte Pathianin a chawimawi ṭhin thu a sawi bawk.

Hockey Women's Junior Asia Cup final-ah India hian China chu hun pangngaiah 1-1 a an inhnehtawkpui hnuin, penalty-ah 3-2 in an hneh a, Rinpuii bakah hian Kanghmun S tleirawl Lalthantluangi chu champion team-ah hian an tel. Player pahnih hi India innghahna Lalremsiami zirchhuahna, Thenzawl-a Women’s Hockey Academy aṭanga inzirchhuak ve ve an ni.