I Day Football 2016 Dingngheta goal-in BVT chhan thei lo

Nimin tlai Lammual inkhel-ah Zo United leh Bethlehem Vengthlang FC te 2-2 in an inhnehtawk. Nikum I Day Football finalist BVT tan semifinal beisei theih a ni ta lo.

Zo United-in H. Malsawm-tuanga leh Lalṭhazuala (Puitea) hmangin ṭum hnih zet hma hruai mah se BVT lamin PC Zosanga leh Laldingngheta hmangin an sut ve ve a, club pahnih hi an result-ah an lungawi lo ve ve.

Vanlalrova'n Vanglaini palai hnenah tlarhnung ven ṭhat an ngaih pawimawh thu a lo sawi tawh a, amaherawhchu khelmual chhungah tlarhnung player-te'n tihsual an ngah avangin goal an venghim thei lo.

I Day Football-ah goal chhuah miah lo team an awm tawh lo a, Zo United hian goal an chhuah ta - group-ah pahnihna niin Dinthar FC ban phakah an awm tawh.

Royal Wahingdoh midfielder hlui H. Malsawmtluanga'n minute 12-na lekah freekick
aṭangin Zo United goal hmahruai mawi takin a khung a. Minute riat hnuah defender Lalnunpuia tihsual vangin cool takin PC Zosanga'n BVT si phurh a sût.

Zo United hian corner hmang ṭangkaiin Puitea hmang-in minute 36-naah hma hruai leh mah se second half ṭan aṭanga minute riatna lekah captain Dingngheta'n BVT tan goal a khung.

2-2 a nih hnu hian chance ṭhahnem tak a awm zui a, Tlangnuam tlangval Mala'n freekick a khung nawn thei loh ang bawkin Dingngheta'n counter attack a hmang ṭangkai thei lo.

I Day Football group stage-in tawp lam a hnaih zel a, BVT-in Group B aṭangin besei tur nei tawh lo mah se Shillong Lajong, Zo United FC, Dinthar FC leh Ramhlun North FC te zingah lut chiang a la awm bik lo - inkhel a ngaihnawm chho zel ang.