Dar 2:45-ah Dinthar Vs Ramhlun N

Bethlehem Vengthlang tan I Day Football semifinal lut turin Zo United laka point khat hlawh-chhuah a tawk lo a, amaherawhchu he result vang hian vawiin tlai dar 2:45-a Dinthar FC leh Ramhlun North FC te inkhel tur a nung sawt.

Dinthar FC-in anmahni aia vawi khata khel tam Zo United chu point hnih chiahin an pha lo. 2014 I Day Football champion hian vawiin tlaia MPL kaithar Ramhlun North an hneh chuan semifinal kawngka chabi kawltu an ni ang. Chutihrualin Lalruatliana Sailo (Tawia) hote tan inelna a la tawp lo a, knockout stage thlen theihna kawng a la awm.

Chakna chance 80%

Dinthar FC coach Lalchhuanawma (LCh-a) chuan, "Ramhlun North ai hian team ṭha zawkah ka inngai a, kan chakna chance chu 80% a ni. Amaherawhchu MPL khel pha chin hi chu team ṭha vek an ni a, eng result pawh thleng thei a ni," tiin a sawi.

Chanmari FC coach hlui LCh-a hi a ṭawng pawr satliah lo, Ramhlun North coach Tawia pawhin a thusawi hi eng emaw chen chu a
ṭawmpui a, "Dinthar hi kan practice hma thla khat liam ta khan an inpuahchah tawh a, practice match-a kan inhmachhawn ṭum pawhin khelh an harsa tawh hle a ni," tiin a fak.

Engtin zel?

Ramhlun North coach Tawia chuan, "Keini chuan I Day Football-a champion hi kan tum ber a ni lo a, tun inelna hi team ṭha kan nih theih nana inzirna atan kan hmang tih club hotute leh vengchhung mipuite pawhin min hriatpui a ni. Result dang vangin kan buai lo a, keini chuan kan khelh apianga ṭha taka khelh hi kan tum chu a ni," tiin Vanglaini palai a hrilh.

MPL kaithar hian Shillong Lajong 4-1 in an hneh lo a, Dinthar laka an tih tur hmasa ber chu tlarhnung siamṭhat a ni. Vawiin hian captain Lalramthlamuana chu tlarhnungah a rawn ding tawh dawn a, mamawh chhanna nih a rawn tum ang.

Dinthar coach LCh-a pawhin, "Training-naa kan zir khelmuala lanchhuah tir hi tun I Day Football-a kan tum chu a ni a, chuvangin midang result-ah kan innghat lo," tiin a sawi. Dinthar hian tun inelnaah goal khat chiah an la khung a, Michael Lalremruata leh Samuel Laltlanthanga te an nei tih hriat phei chuan an goal khung zat hi a tlem hle a ni.

Fixtures & Standings

Nimin Inkhel Result

Bethlehem VT 2 - 2 Zo United FC

BVT : PC Zosanga 20'; Laldingngheta 53'

Zo United : H. Malsawmtuanga 12'; Lalṭhazuala (Puitea) 36'

Vawiin Inkhel Tur

2:45 PM Dinthar FC Vs Ramhlun North FC

August 6, Inrinni

12:00 PM Zo United FC Vs Shillong Lajong FC

August 8, Thawhṭanni

12:00 PM Ramhlun North FC Vs Bethlehem VT FC

August 9, Thawhlehni

12:00 PM Shillong Lajong FC Vs Dinthar FC

# Team Pld W D L GF GA GD Pts

1 Shillong Lajong 2 2 0 0 6 2 4 6

2 Zo United FC 3 1 2 0 3 2 1 5

3 Dinthar FC 2 1 0 1 1 1 0 3

4 Ramhlun North FC 2 0 1 1 1 4 -3 1

5 Bethlehem VT FC 3 0 1 2 3 5 -2 1