Rio Summer Olympic kan nghak chhuak ta

Khawvela infiammite intawh-khawmna lian ber 2016 Summer Olympic chu Inrinni zing dar 4:20 (Anni lama Zirtawpni zan) hian Brazil-a stadium hming-thang Maracana Stadium-ah a khuhawnna neih a ni dawn ta, he hunah hian intihhlimna hun hman tur niin hmuhnawm hrang hrang en tur a awm dawn bakah zai thiam an zai dawn bawk. Ram hrang hrang sorkar hruaitu lu 100 chuang zet an inlan tura ngaih a ni bawk - Star Soprts 1 leh Star Sports 4-ah te live a ni ang.

Rio Olympic hi South America khawmualpuia Summer Olympic hmasa ber tur a ni a, National Olympic Committee hnuaia ram 207 aṭangin infiammi 11,239 zet an inlan dawn. Inelna hi chi hrang hrang 28 zet a awm dawn, heng aṭang hian peng hrang awm lehin a vaia gold medal awm zat chu 306 a ni.

Brazilian film director Fer-nando Meirelles leh producer Daniela Thomas bakah London Olympic opening lama hnuhma lo nei tawh Deborah Colker te chu tun ṭuma bul tumtu an ni a, opening ceremony-ah hian chanvo nei 6000 vel zet an awm.

Meirelles hian ṭul lo tak leh uchuak taka sum hman an tum loh thu a lo sawi lawk tawh a, Beijing leh London nena khaikhin chuan kuminah hian sum an hmang tlem dawn. Tun Olympic budget pumpui US dollar tluklehdingawn 9.7
aṭanga 10% chu opening ceremony-ah hian hman a ni ang.

2008 Beijing Olympic opening ceremony-ah khan mipui 15,000 zet inlanin an sum senral khan US dollar maktaduai 100 zet nia chhut a ni - hei hi khawvela Olympic chanchina a khuhhawn nana sum sen ral hnem ber ṭum a la ni hial. 2012 London-ah khan Rs 2,40,28,39,480.80 zet hmanral a ni bawk a, Olympic hnuhnung pahnih nena khaikhin chuan kuminah hian sum an seng tlem zawk tura ngaih a ni.

Maracana Stadium

Inelna neihna tur hmunpui ber Maracana Stadium hi kum 1950 khan FIFA World Cup khelh nan Rio khawpuiah hawn a ni a, July 16-a final khelha Uruguay-in 2-1 a a thlengtu Brazil an hneh lai kha a hmunah mipui 199,854 zetin an en! Hei hi khawvela inkhel entu punkhawm tam ber ṭum a ni. Kum 2010-13 chhunga siamṭhat a nih hnuah mipui 78,838 leng tura siam danglam a ni a, Olympic-ah hian seat 78,639 a awm ang.

Tun dinhmunah he khelmual hi South America rama stadium lian ber dawt niin Peru rama Estadio Mo-nu-mental (80,093) chiah tluk loh a nei. Brazil stadium neih tam tak zing-a an chhuanvawr ber niin 2007 Pan Ame-rican Games, 2013 FIFA Con-fe-de-ra-tions Cup leh 2014 World Cup final khelh nante khan hman a lo ni tawh. Kuminah hian a khuhhawn nan leh kharna hun hman nan hman a ni dawn.

India

India tana Olympic-a mimal gold medal la hmasa ber chu Abhinav Singh Bindra a ni. Punjab shooter hian 2008 Beijing Olympic-ah khan 10 m Air Rifle-ah pakhatna dinhmun a luah, tun ṭumah hian kum 33-a upa Abhinav hi a inlan leh dawn a - a khuhhawnna neih huna India Flag kengtu (Flag bearer) a ni ang.

India hian infiammi 124 zet a tir thei dawn a, 2012 London Olympic-a infiammi a tirh ai khan 41 zetin an tam. Indian athlete zingah hian Laruatfeli Hnialum chu hmeichhe hockey reserve-ah a tel ve a, Mizo dang hming a lang lo.