Baggies-ah Sakho kal dawn lo

Premier League club West Brom chuan West Ham striker Diafra Sakho chu pound maktaduai 15-in an lalut tura ngaih ni mah se nimin lama medical neih zawh hnuah ṭhulh a ni.

Kum 26-a upa striker Sakho transfer hi kaltluang se chuan Baggies chanchina an player manto ber a ni ang. Senegalese striker hian Hammers tan season hnih chhung a khel tawh a, hliam vanga a buai reng chungin league match 44-a inlanah goal 15 a khung.

Hetihrual hian Sakho hi Crystal Palace leh Stoke City rim lai striker Saido Berahino thlak nan Baggies hian lakluh an tum nia ngaih a ni a, Potters hian England Under-21 international manah hian pound maktaduai 17 pek bakah a chet ṭhat dan a zira pound maktaduai 3 pek belh an inhuam. Amaherawhchu West Brom-in Senegalese striker an lakluh leh tak si loah chuan Berahino hmalam hun pawh hriatthiam a har hle.